Me rastin e vdekjes së diplomati austriak dhe ish-negociatorit për statusin e Kosovës, Albert Rohan, Telegrafi sjell në kujtesë shkrimin e botuar në të përditshmen “Lajm” më 2006, për lidhjet e tij të gjakut me mbretëreshën Geraldine.
Lulzim Mjeku
Zëvendësi i të emëruarit të OKB-së për ndërmjetësim në bisedimet për statusin e Kosovës, ambasadori Albert Rohan, duket se përveç emrit nga gjyshi i tij, Konti Albert Apponyi (1846-1933), ka trashëguar edhe ekspertizën për Ballkanin.
Gjyshi i tij nga vija e nënës është pjesëtar i familjes së njohur aristokrate hungareze Apponyi. Konti Apponyi ka qenë 53 vjet aktiv në politikë, si anëtar Parlamenti, Kryeministër, Kryetar Parlamenti dhe Ministër Arsimi.
Oratori më brilant i kohës, Konti Apponyi, pas Luftës së I-rë Botërore ka përfaqësuar disa herë Hungarinë në Lidhjen e Kombeve. Duket se ndërmjetësi Rohan, i lindur tre vjet pas vdekjes së gjyshit të tij Kontit Albert Apponyi, jo vetëm që trashëgoi emrin e gjyshit, por i përngjan për nga dija e gjuhëve të huaja. Rohan zotëron anglishten, frëngjishten, spanjishten. Gjyshi i tij një monarkist, ka folur rrjedhshëm dhe me elokuencë, anglishten, ndërsa në konferencën e Versajës, si kryesues I delegacionit të Hungarisë përdori me mjeshtri pesë gjuhë.
Ambasadori Rohan në vitet 1966-1968 ka shërbyer në Ambasadën e Austrisë në Beograd. Më vonë ai ka shërbyer në ambasadën në Londër, Argjentinë, Uruguai dhe në Paraguai. Është autor i librit: ”Diplomati në periferi të politikës botërore”, botuar në vitin 2002.
Gjyshi i maternal i ambasadorit Rohan, Konti Albert Apponyi, vinte pra nga familja aristokrate Apponyi prej nga vinte edhe bashkëkohësja e tij Kontesha Geraldine Apponyi, e cila u kurorëzua me Mbretin Zog në vitin 1938. Miqësia vazhdon edhe sot. Rohan njihet me Princin Leka I dhe marrëdhëniet me Kosovën janë në nivelin më të lartë të miqësisë. /Telegrafi/