Ambasadorja e Bashkimit Evropian në Shqipëri, Sofia Moreira de Sousa, zhvilloi takime me ministrin e Financave, Petrit Malaj, dhe ministrin e Drejtësisë, Toni Gogu, ku në fokus ishin disa prej çështjeve kryesore të procesit të anëtarësimit të Shqipërisë në Bashkimin Evropian.
Në takimin me ministrin Malaj, ambasadorja theksoi rolin e Ministrisë së Financave në menaxhimin e fondeve të BE-së, si dhe në përgatitjen e Shqipërisë për detyrimet financiare që lidhen me anëtarësimin.
“Ministria e Financave luan një rol kyç në procesin e anëtarësimit, pasi menaxhon fondet e BE-së dhe përgatit vendin për detyrimet financiare që sjell anëtarësimi”, u shpreh Moreira de Sousa.
Ajo bëri të ditur gjithashtu se rikonfirmoi mbështetjen e Bashkimit Evropian për punën e Shqipërisë në këto drejtime.
Ndërkohë, në takimin me ministrin e Drejtësisë, Toni Gogu, në qendër të diskutimeve ishte reforma në drejtësi dhe prioritetet e Shqipërisë në rrugën drejt integrimit evropian.
Ambasadorja nënvizoi rëndësinë e forcimit të besimit të qytetarëve te sistemi i drejtësisë, duke e cilësuar atë si thelbësor për të ardhmen e Shqipërisë në BE.
“Besimi i publikut te sistemi i drejtësisë është thelbësor për të ardhmen e Shqipërisë në BE”, deklaroi ajo.
Moreira de Sousa theksoi nevojën për zbatimin e qëndrueshëm të reformës në drejtësi dhe vijimin e punës mbi prioritetet e anëtarësimit, duke shprehur gatishmërinë e BE-së për të mbështetur progresin e mëtejshëm të Shqipërisë.
