Denion Meidani dhe Petrit Malaj prezantuan prioritetet e tyre në seancën dëgjimore, përpara marrjes së detyrave të reja si ambasadorë të Shqipërisë në Kosovë dhe Maqedoninë e Veriut. I propozuar për postin e ambasadorit në Prishtinë, Denion Meidani e cilësoi detyrën e re si një përgjegjësi me rëndësi të veçantë personale, duke iu referuar trashëgimisë së të atit, ish-presidentit Rexhep Meidani. Duke folur për perspektivën evropiane të Kosovës, ai vuri në dukje pengesën që krijon mosnjohja e pavarësisë së saj nga pesë vende anëtare të Bashkimit Evropian: Qiproja, Greqia, Rumania, Sllovakia dhe Spanja. “Meqë statusi i vendit kandidat kërkon unanimitet, pa këto pesë njohje rruga evropiane e Kosovës mbetet e bllokuar në vetë pragun e saj”, deklaroi Meidani.
Ai rikujtoi gjithashtu qëndrimin e Shqipërisë gjatë luftës në Kosovë, duke e lidhur angazhimin e tij diplomatik me një histori familjare. “Në pranverën e vitit 1999, kur Kosova po kalonte orët e saj më të errëta, babai im, Rexhep Meidani, premtoi se Shqipëria do të mbetej e hapur. Për mua, tashmë të përfaqësoj Shqipërinë në Prishtinë është një nder i madh. Mbaj me vete ADN-në e babait tim”, u shpreh ai. Një tjetër çështje e prekur nga ambasadori i propozuar ishte debati për ndryshimet në ligjin për Dhomat e Specializuara të Kosovës. Meidani mbështeti procesin e Apelit dhe theksoi se karakteri çlirimtar i luftës së Kosovës duhet të mbetet i padiskutueshëm.
Petrit Malaj i cili lë detyrën në Prishtinë për të përfaqësuar Shqipërinë në Shkup, sinjalizoi një qasje aktive ndaj zhvillimeve politike dhe institucionale në Maqedoninë e Veriut. Në deklaratat e tij, ai la të kuptohet se synon të mbajë një qëndrim më të drejtpërdrejtë në çështjet që lidhen me respektimin e Kushtetutës dhe Marrëveshjes së Ohrit.
“Unë nuk do jem ambasadori që nuk ndërhyn në politikën e brendshme të Maqedonisë së Veriut, por do të jem ambasadori që në çdo komunikim institucional, do të mbështesë dhe kërkojë respektimin e Kushtetutës dhe Marrëveshjes së Ohrit”, tha Malaj. Ai e renditi mbrojtjen e të drejtave të shqiptarëve ndër prioritetet kryesore të mandatit të tij, duke theksuar se ky angazhim nuk duhet të shihet si kundërvënie ndaj komunitetit maqedonas. “Të jesh krah shqiptarëve s’do të thotë të jesh kundër maqedonasve. Përkundrazi, mbrojtja e të drejtave të shqiptarëve duhet të jetë pjesë e mbrojtjes së karakterit multietnik dhe demokratik të vetë shtetit”, u shpreh ambasadori i propozuar.