Deputeti i PS-së, Erion Braçe thotë se në protestën e së hënës për Zvërnecin kishte edhe socialistë të cilët sipas tij ndihen të përjashtuar. Për të partia duhet të qeverisë me ta, por shtoi se Shqipëria nuk e ka luksin e humbjes së një projekti të tillë. ”Unë mendoj se jemi ende në kohë. Ende nuk ka një leje ndërtimi të miratuar. Le t’i vendosim në ekuilibër këto interesa dhe të fitojmë një projekt të mirë, në të mirë të të gjithëve, në të mirë të Shqipërisë. Fitorja është gjithmonë më e mirë se humbja. Do të jetë fitore për të gjithë, ashtu siç humbja do të ishte humbje për të gjithë”,-shkruan Braçe.
Postimi i plotë
1. PROTESTA KISHTE NJERËZ
Protesta kishte njerëz: qytetarë të thjeshtë, të zakonshëm, shumë prej të cilëve kishin lënë angazhimet e tyre për të na thënë me zë të lartë dhe publikisht mendimin e tyre, atë që ata kundërshtojnë. Mes tyre kishte edhe natyrëdashës, natyralistë, quajini si të doni,por thelbi i tyre është natyra, energjia e mirë që ajo përcjell dhe të mirat që vijnë prej saj sot dhe në afat të gjatë, për fëmijët e sotëm dhe brezat e ardhshëm. Duhet të mësohemi me të gjithë këta njerëz. Ata janë si ne dhe duan të mirën publike. Natyrisht, duhen refuzuar abuzuesit dhe përfituesit politikë, urrejtësit politikë, teknofashistët dixhitalë të së djathtës dhe të së majtës, sharësit, fyesit, shpifësit, kërcënuesit trendi më i ri banal i politikës. Bashkë me ta janë edhe dezinformuesit dhe, në fund të tyre, rrugaçët që bërtasin pa turp për familjet e tyre, ndërsa kori i tyre shan familjet e të tjerëve; në fakt, të të gjithëve. Të gjithë bashkë përbëjnë shumë më pak se shumica e qytetarëve që kërkojnë dialog dhe mirëkuptim. Kishte edhe socialistë aty. I pashë vetë. I kam njohur në rrugët e këtij qyteti gjatë këtyre muajve.
2. DUHET TË QEVERISIM ME TA
Duhet të qeverisim me njerëzit që na kanë votuar. Socialistë, të majtë, qytetarë të thjeshtë pa bindje politike, por me besim tek ne, kanë deleguar fuqinë e tyre përmes votës dhe na kanë dhënë mundësinë të qeverisim. Duhet të qeverisim me ta, jo pa ta; për ta dhe me ta. Ata po na flasin përballë. Ndihen të lënë mënjanë, të përjashtuar nga proceset vendimmarrëse. Ata duhet të dinë, të jenë të informuar, të kenë mundësi të pyesin, të marrin përgjigje, të flasin, të dëgjohen, të diskutojnë e të debatojnë, të kritikojnë, të kundërshtojnë dhe të miratojnë një vendimmarrje të plotë e të qëndrueshme. Kjo nuk e pengon procesin; përkundrazi, e garanton atë.
3. SHQIPËRIA NUK KA LUKSIN TË HUMBË NJË PROJEKT TË TILLË
Humbja jonë do të ishte luks për ata që nuk duan të na shohin konkurrues. Prandaj unë insistoj te njohja e interesave legjitime të natyralistëve, të cilat janë edhe një nga arsyet pse ky projekt vjen këtu; te njohja e interesave legjitime të pronarëve të ligjshëm, jo të atyre që e kanë përfituar pronën e njohur si fond pyjor duke e falsifikuar si tokë bujqësore, në emër të një minoriteti apo përmes vendimeve abuzive të gjyqtarëve të korruptuar; si edhe te njohja e interesave legjitime të të gjithë atyre që duan të përfitojnë nga ekonomia. Unë mendoj se jemi ende në kohë. Ende nuk ka një leje ndërtimi të miratuar. Le t’i vendosim në ekuilibër këto interesa dhe të fitojmë një projekt të mirë, në të mirë të të gjithëve, në të mirë të Shqipërisë. Fitorja është gjithmonë më e mirë se humbja. Do të jetë fitore për të gjithë, ashtu siç humbja do të ishte humbje për të gjithë. Pas atij projekti qëndron një ekonomi e tërë: njerëz që punësohen, të ardhura që rriten, prodhues që zgjerohen dhe ofrues shërbimesh që zhvillohen po ashtu. Janë mijëra njerëz pjesë e këtij zinxhiri ekonomik. Kjo quhet ekonomi e gjelbër. Dhe pikërisht për shkak se është e gjerë dhe gjithëpërfshirëse, ajo e bën ekonominë më demokratike.