PD përmes sekretarit të Departamentit të Sporteve, Albano Stolaj, thotë se propozimi i PS-së për hartën e re territoriale, i cili parashikon shkrirjen e 15 bashkive, rrezikon klubet sportive. Stolaj deklaroi se qeveria duhet të sqarojë se si do të financohen dhe administrohen klubet sportive pas zbatimit të reformës territoriale. Sipas tij, mbeten pa përgjigje edhe çështjet që lidhen me stadiumet, pallatet e sportit, terrenet sportive dhe akademitë e të rinjve.
Deklaratë e sekretarit të Departamentit të Sporteve në PD, Albano Stolaj:
Prej vitesh, komuniteti sportiv shqiptar pret një gjë thelbësore: një Ligj për Sportin që krijon kushte reale për financimin dhe zhvillimin e klubeve, mbështet sportistët dhe trajnerët dhe u jep perspektivë mijëra fëmijëve e të rinjve në të gjithë Shqipërinë.
Në vend të një reforme që i jep frymëmarrje sportit, qeveria e Edi Ramës propozon shkrirjen e 15 bashkive, duke vënë në pikëpyetje edhe të ardhmen e klubeve sportive që financohen dhe mbahen gjallë prej tyre. Partia Demokratike ngre alarmin për një pasojë të këtij procesi për të cilën deri tani pothuajse nuk është folur:
Çfarë do të ndodhë me klubet sportive të bashkive që do të shkrihen?
Kur shkrihet Bashkia Cërrik, çfarë do të ndodhë me Turbinën?
Kur shkrihet Bashkia Patos, çfarë do të ndodhë me Albpetrolin?
Kur shkrihet Bashkia Maliq, çfarë do të ndodhë me klubin dhe me një komunitet tifozësh që vazhdon ta mbështesë atë çdo javë, pavarësisht rezultateve?
Dhe çfarë do të ndodhë me klubet dhe aktivitetin sportiv në Memaliaj, Dimal, Klos dhe qytetet e tjera që preken nga reforma?
Këta që përmenda e të tjera si ata, nuk janë vetëm ekipe futbolli. Për shumë qytete të vogla klubi sportiv është pjesë e identitetit të qytetit, një nga aktivitetet e pakta që mbledh komunitetin, krijon jetë sociale dhe u ofron fëmijëve dhe të rinjve një mundësi për t’u marrë me sport.
Prandaj, përpara se të vendosë shkrirjen e bashkive, qeveria duhet t’u përgjigjet qytetarëve:
Kush do t’i financojë këto klube pas shkrirjes së bashkive?
Kush do të marrë pronësinë dhe administrimin e tyre?
Çfarë do të ndodhë me stadiumet, pallatet e sportit, terrenet sportive dhe akademitë e të rinjve?
A ekziston një plan për garantimin e vazhdimësisë së klubeve, apo ato do të lihen të zhduken së bashku me bashkitë që i financojnë?
Partia Demokratike e ka kundërshtuar reformën e njëanshme territoriale si ‘hartë elektorale’, por ne e kundërshtojmë edhe si dëmtim të identiteteve lokale, dhe këtu nuk mund të lëmë jashtë edhe ekipet sportive të këtyre bashkive, të cilat PS kërkon t’i kalojë në gijotinë për synime elektorale. Kur shuhet një klub, nuk humbet vetëm një ekip, por edhe një pjesë e identitetit të qytetit. Një traditë, e cila edhe pse nuk mund të jetë e madhe dhe e famshme, ka gjënë thelbësore, që na bën njerëz: hapësirën ku bashkohet komuniteti.
Ata mijra vetë që dalin prej 69 ditësh në protestë, janë aty edhe për këtë qëllim. Jo vetëm për zonat e mbrojtura dhe korrupsionin qeveritar, por edhe ‘flamingot’ e pambrojtura të bashkive të vogla që përfaqësojnë komunitete dhe tradita të spikatura e të mëvetshme lokale, përfshirë këtu edhe ekipet e mijëra zemrave nga Patosi në Maliq. Në fund një mesazh për Kryeministrin, që përditë rrëzon diçka të përbashkët të shqiptarëve dhe ngre kulla të përveçme të oligarkëve dhe narkoeurove: është koha e rrëzimit tënd dhe shpëtimit të Shqipërisë!