Nga Elda Keçi Novelli
Shoqata e Restoranteve dhe Bujtinave Shqiptare, në bashkëpunim me Bashkinë e qytetit liqenor të Pogradecit, organizoi dje, më 25 korrik 2026, një takim të veçantë kombëtar të ndërthurur me degustim, duke sjellë në vëmendje vlerat më të larta të mikpritjes, kulinarisë dhe traditës shqiptare. Ky aktivitet vjen si pjesë e nismës kombëtare për promovimin e turizmit dhe gastronomisë autentike shqiptare në pikat më strategjike të vendit.
Në qendër të këtij takimi ishte prezantimi i nismës simbolike të mikpritjes, e cila bazohet në moton: “Bukë, Kripë e Zemër, Ujë, Vaj Ulliri dhe Buzëqeshje”. Ky gjest, i kthyer tashmë në një standard për strukturat anëtare të shoqatës, synon që çdo vizitor dhe turist të pritet me produktet bazë të tokës shqiptare dhe me bujarinë karakteristike të vendit tonë.
Bashkëpunimi ndërrajonal dhe vizioni i Shoqatës morën një rëndësi të veçantë institucionale falë pjesëmarrjes së autoriteteve vendore dhe përfaqësuesve të rëndësishëm të institucioneve, biznesit dhe organizatave të turizmit.
Të pranishëm në këtë aktivitet ishin:
z. Luan Bregasi – Kryetar i Dhomës Kombëtare të Zejtarisë;
z. Agim Shahini – Kryetar i Aleancës Kosovare të Bizneseve;
z. Mehdi Qyra – Kryetar i Komunës së Strugës;
z. Baki Hoti – Kryetar i Unionit Turistik të Kosovës;
përfaqësues të institucioneve qendrore dhe vendore;
anëtarë të Këshillit Drejtues të Shoqatës;
përfaqësues të prodhuesve vendas;
përfaqësues të Shoqatës “Gorë-Opar e Bashkuar”, me kryetare znj. Xhuljeta Bregasi, etj.
Përmes kësaj iniciative synohet promovimi i turizmit shqiptar, mbështetja e prodhimeve vendase dhe forcimi i bashkëpunimit ndërmjet institucioneve, biznesit dhe komunitetit.
Gjatë fjalës së tij, Kryetari i Shoqatës së Restoranteve dhe Bujtinave Shqiptare, z. Kujtim Dervishi, vuri theksin te rëndësia e identitetit kombëtar në gastronomi:
“Pogradeci dhe e gjithë zona e juglindjes mbartin një pasuri të jashtëzakonshme kulinare. Me nismën tonë të mikpritjes, ne duam që çdo turist të kuptojë se ushqimi në Shqipëri nuk është thjesht një shërbim, por është histori, kulturë dhe, mbi të gjitha, bujari. Shija dhe produktet tona lokale janë pasaporta më e mirë e turizmit tonë gastronomik”, – u shpreh ai.
Mjediset elegante buzë liqenit të Restorantit “1 Maji” shërbyen si shtëpia e këtij organizimi të veçantë. Pas fjalës përshëndetëse të Prefektit të Tiranës, z. Shkëlqim Hajdari, i cili vuri në pah mbështetjen e tij të vazhdueshme për nismat e kësaj shoqate, përshëndeti të pranishmit edhe Prefektja e Qarkut Korçë, znj. Florinda Zejgulla, si dhe Kryetari i Bashkisë së Pogradecit, z. Ilir Xhakolli.
Më pas, vëmendja e të pranishmëve u zhvendos te tryeza e madhe e degustimit, e cila u shndërrua në një udhëtim të vërtetë në artin e gatimit shqiptar. Mjeshtëria e kuzhinës së Restorantit “1 Maji” prezantoi një shumëllojshmëri asortimentesh të harmonizuara me verërat lokale.
Çdo pjatë e degustacionit u shoqërua në mënyrë të përsosur me verëra të përzgjedhura nga kantinat më të njohura të rajonit të Korçës dhe Pogradecit, duke nxjerrë në pah vlerat e kulinarisë shqiptare. Krahas peshkut, në tryezë u ekspozuan djathëra artizanalë, bukë e përgatitur me miell të lashtë të bluar në gur dhe vaj ulliri i virgjër.
Ky aktivitet në Restorantin “1 Maji” rikonfirmoi se Pogradeci nuk është më thjesht një qytet tranzit, por një destinacion i rëndësishëm i turizmit kulturor dhe gastronomik në Shqipëri, duke bashkuar peizazhin magjepsës të Liqenit të Ohrit me shijen e paimitueshme të traditës, të shoqëruar me këngë e valle.
Aktiviteti dhe degustacioni u zhvilluan pikërisht në mjediset e njohura të Restorantit “1 Maji” në Pogradec, një lokacion strategjik buzë Liqenit të Ohrit, që ofron një panoramë mbresëlënëse dhe hapësirën e duhur për organizime të këtij niveli.
