Deputetja e Partisë Socialiste, Olta Xhaçka, ka reaguar në Kuvend lidhur me vendimin e Dhomave të Specializuara për Kosovën në Hagë, që dënoi katër ish-krerë të UÇK-së. Gjatë fjalës së saj, Xhaçka i cilësoi “shumë të rënda” dënimet e dhëna pas një procesi gjyqësor që zgjati rreth gjashtë vite, përfshirë periudhën e paraburgimit.
Ajo theksoi se respekti për institucionet e drejtësisë, sipas saj, nuk duhet të nënkuptojë heshtjen përballë vendimeve që ngjallin debat.
“Pas afro 6 vitesh paraburgim, pas një procesi të jashtëzakonshëm në kohëzgjatje, dënimet e djeshme ishin shumë të rënda. Respekti për institucionet nuk mund të kërkojë prej nesh heshtjen. Sepse ky proces nuk zhvillohet jashtë historisë dhe historia nuk filloi në Hagë, por në Kosovë. Në një Kosovë ku një regjim kishte vendosur t’i përgjigjej kërkesës së një populli për liri, me dhunë e represion. Vetëm në muajt e fundit të luftës janë vrarë 10 mijë shqiptarë. Sa mijëra gra e vajza u përdhunuan.
Dhuna seksuale u përdor për të terrorizuar dhe poshtëruar një popull. Trupat e shqiptarëve të vrarë u transportuan edhe qindra kilometra larg Kosovës dhe u fshehën në varre masive kudo ne Serbi. Kjo kur historia që s’mund të shkëputet nga asnjë diskutim për luftën e Kosovës. Sot ka ardhur koha që asambleja parlamentare e Këshillit të Europës ta rihapë rezolutën 17/82. Është një çështje që Shqipëria duhet ta ngrejë në Këshillin e Europës”, tha mes të tjerash Xhaçka.