Krerët e partive të reja në sherr e përplasje me keq se sa PS-PD. Kreu i “Nismës Shqipëria Bëhet”, Adriatik Lapaj ka denoncuar në Gjykatën e Posaçme për shpifje, Agron Shehajn.
Në dyert e GJKKO-së, Lapaj është shprehur për gazetarët se ka të paktën tetë raste të dokumentuara të shpifjes.
“Unë i kam dhënë kohë zotit Shehaj prej një muaji, por edhe vetes, për të reflektuar, sepse nuk e kam dashur këtë konflikt, sepse ai që fërkon barkun në këtë konflikt është Edi Rama. Por Shehaj e kërkoi me qiri, duke pretenduar se paskemi gjëra për të fshehur dhe frikë.
Unë nuk kam pasur frikë nga Edi Rama dhe Berisha, jo nga Agroni. Unë nuk kam dashur të krijojë një kurs konflikti mes të resë, por kush kërkon luftë, luftë do gjejë. Si ta kërkojë, ashtu do e gjejë. Sot po dorëzoj si akuzues i dëmtuar padinë pranë Gjykatës së Posaçme dhe Shehaj duhet të vijë këtu të provojë pretendimet.Unë Adriatik Lapaj, as nëna as babai dhe asnjë familjar I rrethit të parë timin nuk ka asnjë metër tokë në Republikën e Shqipërisë.
Ka të paktën tetë shpifje ndaj meje.”
Kujtojmë se në emisionin ‘Opinion’ e të enjtes së kaluar, kreu i partisë “Mundësia”, Agron Shehaj solli disa dokumenta të cilat sipas tij tregojnë se kreu i “Nismës Shqipëria Bëhet”, Adriatik Lapaj përfshihet në çështje pronash në bregdetin e Shqipërisë.
Sipas Agron Shehajt, Lapaj përfshihet ose si ndërmjetësues investimesh strategjike, ose si përfaqësues kompanie që pastron para krimi për të marrë prona në Ksamil që vjehrri i tij i kishte gjykuar si kryetar i Gjykatës së Sarandës.
Shehaj në fjalën e tij u shpreh se është e vështirë të gjesh një pronë në bregdet që s’ka futur hundët Adriatik Lapaj, duke nënkuptuar se janë shumë çështje, për të cilat janë në dijeni si kryetarët e partive të mëdha e të vogla, ashtu edhe media, por nuk flasin.
Lapaj reagoi live në emision, duke i nisur një mesazh Blendi Fevziut, duke bërë të ditur se do të padisë deputetin Agron Shehaj ditën e hënë për akuzën e shpifjes.