Kreu i Partisë Demokratike, Sali Berisha, ka prezantuar sot detaje të tjera në lidhje me programin e PD në nxitje të prodhimit vendas dhe uljen e taksave.
“Ekonomia është programi i Shqipërisë Madhështore. Konsulta intensive janë zhvilluar me biznesin, me grupet e interesit ndaj dhe ato janë pasqyruar në programin tonë.
Kështu që sot po ju paraqes ju edhe njëherë të plotë programin e “Made in Albania”, programi që synon të nxisë prodhimin në Shqipëri, të ndezë motorët e prodhimit që po shuhen, po bien nga viti në vit në mënyrë të pandalshme.
Përveç garancive ligjore të një kodi fiskal që do miratohet tre muajt e parë të qeverisjes tonë dhe nuk do mund të ndryshohet, përveçse në rast se lehtësohet, por jo rëndim për biznesin gjatë 4 viteve.
Pra, kodi fiskal që do miratohet 3 muajt e parë do mund të ndryshohet gjatë 4 viteve jo për rëndime, por vetëm për lehtësime.
Do të ulet numri i shkallëve të ndryshmeve tatimore. Vendoset taksa e sheshtë 10 për qind mbi kapitalin, mbi të ardhurat nga puna, me përjashtim të 50 mijë lekëve të para që nuk do tatohen. Taksa e sheshtë 10 për qind mbi të ardhurat jo nga paga. Zero taksim për profesionet e lira dhe biznesin e vogël. Tavani vjetor për tatim-fitimin zero për biznesin e vogël. Kufiri i përjashtimit nga TVSH do jetë 18 milionë lekë xhiro vjetore. TVSH do ulet në 15 për qind, ikën tabuja 20 për qind. Taksa e ndikimit në infrastrukturës do ulet nga 18 për qind e çmimit të shitjes në 2 për qind të preventivit. Shkak themelor i çmimeve strastosferike në ndërtim janë taksat absurde që vendosen mbi sipërfaqen e ndërtimit, të cilat në fakt sipas rastit, minumimi 10-fishuan taksën e përparme dhe në raste të tjera edhe 20 apo 30-fishuan atë. Dhe e gjitha kjo u faturohet qytetarëve, duke ua shndërruar në pamundësi blerje. Ose duke i shndërruar apartamentet në mollë të ndaluara. Jo vetëm kaq, por kjo ka një ndikim shumë të fortë te qiratë. Dhe në vendin me rrogat më të ulëta në Europë, qiratë janë në nivelet më të lartat. Ne e ndryshojmë rrënjësisht këtë situatë. Taksa 3 për qind e strehimit social mbi çmimin e shitjes shfuqizohet. Nuk do ekzistojë. Tarifa 1 për qind e lejes së zhvillimit mbi vlerën e investimit shfuqizohet. Tarifa e rivlerësimit të pronës do ulet nga 5 në 1 për qind”, tha Berisha në një konferencë me gazetarët.