“Akuzat janë të manipuluara”. 24 orë pas arrestimit, botuesi dhe pronari i Universitetit Europian të Tiranës, Henri Çili ka thyer heshtjen. Para oficerëve të policisë gjyqësore në Drejtorinë e Policisë së Gjirokastrës, Çili ka thënë se do të kundërshtojë gjithçka me prova e fakte në gjykatë. Të dielën ai do të paraqitet në Gjykatën e Përmetit, ku do të mbahet seanca e sigurisë ndaj Çilit dhe 27 të arrestuarve në operacionin e gjerë policor koduar “Mezhgorani”.
Henri Çili mësohet të jetë shprehur se gjithçka sipas tij është tërësisht e manipuluar dhe do t’i kundërshtojë në momentin e duhur me prova dhe fakte. Botuesi ka mohuar të jetë i përfshirë apo që të ketë ndikuar tek ndonjë gjyqtar për lirimin ose zbutjen e dënimit të vëllezërve nga Lazarati, Arbjon dhe Alban Aliko, dënuar me vendim të formës së prerë nga Apeli për vrasjen e efektivit të RENEA-s, Ibrahim Basha.
14 nga të arrestuarit ditën e djeshme janë për prodhim dhe shitje të narkotikëve, të tjerët për mashtrim, falsifikim të dokumenteve, armëmbajtje pa leje etj. 45-vjeçari është i dyshuar për 6 vepra penale: “Fshehja e të ardhurave”, “Pastrimi i produkteve të veprës penale ose veprimtarisë kriminale”, “Falsifikimi i dokumenteve”, “Mashtrimit”, “Ushtrimi i ndikimit të paligjshëm ndaj personave qe ushtrojnë funksione publike” dhe “Falsifikimi dokumenteve” në bashkëpunim.
