Kryeministri Edi Rama e konsideroi sot produkt të prapambetjes qasjen e Serbisë ndaj marrëveshjes mes Shqipërisë, Kosovës dhe Kroacisë në fushën e mbrojtjes.
Në një intervistë televizive, Rama u shpreh se “ne nuk kemi bërë aleancë për të shkuar në luftë me asnjë, por kemi bërë një një marrëveshje mes tri shteteve demokratike për të bashkëpunuar në fushën e mbrojtjes”.
“Nuk është aleancë ushtarake për të shkuar në sulm. Në rast se ka tërbim, është thjesht produkt i prapambetjes. Halli nuk është kur shohim produkte të prapambetjes në qasjen e Serbisë, halli është kur shohim Kosovën të sillet në mënyrë të prapambetur”, theksoi Rama.
Kryeministri theksoi se “Kosova nuk ka fare lidhje me Serbinë dhe as nuk duhet ta ketë fare parasysh Serbinë në rrugën e vetë”.
“Për mua Kosova e ka fituar luftën, duhet të fitojë paqen dhe për këtë duhet të sistemohet në tryezën e bashkësisë demokratike. Që ta bëjë nuk duhet të shohë fare nga Beogradi, nuk duhet t’ja dijë fare për Serbinë, nuk duhet t’ja dijë fare për çfarë thonë apo çfarë pretendojnë apo nuk pretendojnë serbët, pot duhet të bëjë detyrat e veta për veten dhe të ardhmen e vetë. Këto lidhen me dialogun por lidhen me BE-në dhe SHBA-në”, tha Rama.
Sipas tij, Kosova duhet t’i përmbushë në mënyrë unilaterale detyrimet që janë vendosur në kuadër të dialogut me Serbinë dhe të shkojë përpara.
“Nuk ka pse të merret me Serbinë. Serbia në këtë aspekt nuk ka çfarë të humbë. Serbia ka humbur në raport me Kosovën. Kosova ka shumë për të humbur dhe po i humb duke u marrë me Serbinë”, shtoi ai. ATSH
