Kryeministri Edi Rama tha sot se “Shqipërinë turistike e bëmë ne dhe askush tjetër”.
“Në radhë të parë me atë rilindjen urbane dhe pastaj me durim me një politikë të jashtme dinjitoze që e ka bërë Shqipërinë lajm të mirë dhe vend të respektuar dhe sigurisht me plot punë të tjera në të gjitha drejtimet”, vuri në dukje Rama duke iu përgjigjur komentit të një ndjekësi në rrjetet sociale, në rubrikën ‘Sy m’sy”.
Kryeministri Rama iu përgjigj komentit: “Nuk është mërita jote që vijnë më shumë turistë është merita e Zotit, që na ka fal një vend të bukur e të bekuar , por është për të ardhur keq që nuk kemi ditur të zgjedhim njerëzit e duhur për të na drejtuar se dhe ti njësoj me Berishën e Metën je, nuk ka asnjë ndryshim prandaj më mirë rri rehat sa të kesh pushtet se ishalla të vjen edhe ty radha siç ju erdhën atyre të luftosh nëpër gjykata e nëpër burgje”.
“Merita e Zotit dmth ftesa për Shqipërinë si vend nderi i panairit global të Berlinit për turizmin. Çudi e madhe, punët tona të mira janë punë e Zotit, ndërsa edhe kur bie shi në tre orë saç binte dikur më parë në 3 muaj dhe ka një përmbytje siç ndodhin kudo për javë në Evropë është faji im, faji i qeverisë. Po lind pyetja po pse kur na e fali ne zoti këtë vend me bukuri të bekuar kur erdha unë në qeveri apo kur Zoti bëri botën dhe i vuri shqiptarët këtu. Pra meqë ne qenkemi të gjithë njësoj sipas teje pse nuk vinin turistët edhe përpara se të vinin PS bashkë me mua në qeveri”, theksoi Rama.
Por, vijoi Rama, meqë deti, malet, lumenjtë aty ishin pse nuk na zinte njeri me gojë për këto bukuri që na ka falur Zoti, por vetëm për plehra dhe tërë të zezat.
“Kush e përmbysi këtë histori të marrëdhënieve të botës me ne dhe kush i bëri të gjithë mediat e botës të flasin për Shqipërinë si destinacion turistik, Zoti. Po pse u kujtua zoti këto vitet e fundit që jemi ne në qeveri dhe nuk deshi t’ia dinte fare përpara kur qeverisnin ata që e bënë këtë vend zhele katran me bojë në sytë e botës dhe që nuk ua hidhte sytë askush, fare. Eh more Sali Kurra edhe emrin e profilit fallco e ke vënë goxha problematik siç thotë populli; Zoti ndihmon ata që ndihmojnë veten”, tha Rama.
Kreu i qeverisë u shpreh se “edhe Shqipërinë turistike e bëmë ne dhe askush tjetër. Në radhë të parë me atë rilindjen urbane dhe pastaj me durim me një politikë të jashtme dinjitoze që e ka bërë Shqipërinë lajm të mirë dhe vend të respektuar dhe sigurisht me plot punë të tjera në të gjitha drejtimet. Shqipëria ftohet si vendi i nderit në panairin global të turizmit në Berlin, ftohet sepse kemi punuar për këtë ditë. Ditë më të mira do të vijnë sepse punojmë për to dhe sepse nuk jemi të gjithë njësoj, por ne jemi shumë më ndryshe. ne jemi vetë ndryshimi”.
/k.s/j.p/