Shqipëria renditet e treta në Barometrin Botëror të Turizmit për periudhën janar-korrik 2023, me një rritje spektakolare prej 56 % në ardhjet e turistëve. Kryeministri Edi Rama ka postuar statistikat e Barometrit Botëror të Turizmit, ku Shqipëria renditet e treta pas Katarit dhe Arabisë Saudite.
“Kemi arritur diçka të pabesueshme: vendi i tretë në Barometrin Botëror të Turizmit për periudhën janar-korrik 2023, me një rritje spektakolare prej 56 % në ardhjet e turistëve”, theksoi ai. Kryeministri u shpreh se “kjo arritje nuk do të ishte e mundur pa përkushtimin dhe punën e palodhur të gjithë këtyre viteve dhe veçanërisht të profesionistëve të industrisë sonë të turizmit”.
“Së bashku e kemi vendosur Shqipërinë në hartë si një destinacion që duhet vizituar dhe do ta bëjmë atë çdo vit gjithnjë e më të mirë. Nga brigjet plot diell të Rivierës shqiptare, deri te bukuria historike e Gjirokastrës, ne kemi diçka për të gjithë”, theksoi Rama.
Po ashtu kryeministri përcolli edhe një mesazh për udhëtarët në mbarë botën: “Ejani të zbuloni perlën që quhet Shqipëri, e pasuruar nga përpjekjet e sektorit tonë të jashtëzakonshëm të turizmit. Mos e humbisni – rezervoni sot aventurën tuaj shqiptare”.