Dje ishte një mbrëmje e veçantë në stadiumin Son Moix Stadium, ku Mallorca priti Valencian në javën e 33-të të La Liga. Por përpara se topi të niste të rrotullohej, vëmendja ishte e gjitha për një emër: Vedat Muriqi.
Sulmuesi kosovar u nderua nga tifozët vendas me një koreografi mbresëlënëse. Në tribunë u shfaq portreti i tij i madh, i shoqëruar me mbishkrimin “Isla Pirata”, nofka që e identifikon dhe që tashmë është kthyer në simbol të lidhjes së tij me klubin dhe qytetin. Një dedikim që pasqyron raportin e fortë që Muriqi ka ndërtuar me tifozët falë paraqitjeve vendimtare.
Sezoni i tij është thjesht i jashtëzakonshëm: 21 gola në kampionat, duke e vendosur mes golashënuesve më të mirë të elitës spanjolle, menjëherë pas Kylian Mbappe.
Me këto shifra, Muriqi ka hyrë në historinë e klubit, duke u bërë golashënuesi më i mirë i të gjitha kohërave për Mallorcan në La Liga, duke lënë pas një emër legjendar si Samuel Eto’o.
Atmosfera në “Son Moix”, me tifozët që mbanin kapele piratësh, ishte dëshmi e një momenti kulmor në karrierën e sulmuesit. Muriqi tashmë nuk është vetëm një lider në fushë, por edhe figura kryesore emocionale e një skuadre që po lufton fort për mbijetesë në elitën e futbollit spanjoll.
