Kristjan Asllani është shumë pranë largimit nga Interi. Mesfushori shqiptar, i lindur në vitin 2002, pritet të vijojë karrierën në Emiratet e Bashkuara Arabe, ku Al Jazira ka arritur marrëveshje për transferimin e tij.
Operacioni parashikon një huazim me pagesë prej 1.5 milionë eurosh, ndërsa marrëveshja përfshin edhe një detyrim blerjeje prej 5 milionë eurosh, i cili do të aktivizohet nëse plotësohen disa kushte të përcaktuara në kontratë.
Asllani është duke përfunduar detajet e fundit të marrëveshjes personale me klubin nga Gjiri. Pasi të arrihet dakorësia përfundimtare, mesfushori shqiptar do të nisë një kapitull të ri në karrierën e tij.
I afruar te Interi si një nga talentet më premtues të mesfushës, Asllani nuk ka arritur të sigurojë një rol të rregullt në formacionin zikaltër. Tashmë, aventura në Al Jazira i jep mundësinë të gjejë më shumë hapësira dhe vazhdimësi në fushën e lojës.
Nëse kushtet e përcaktuara në marrëveshje plotësohen, klubi nga Emiratet do të jetë i detyruar të paguajë 5 milionë euro për transferimin përfundimtar të futbollistit shqiptar.