Manchester City ka depozituar zyrtarisht apelimin ndaj vendimit të Komisionit të Pavarur të Premier League, i cili e shpalli klubin përgjegjës për shumicën dërrmuese të akuzave për shkelje të rregullave financiare.
Klubi anglez e ka dorëzuar apelimin më 1 tetor, një ditë përpara përfundimit të afatit zyrtar. Në deklaratën e tij, City kundërshton përfundimet e komisionit dhe argumenton se vendimi përmban “gabime të qarta materiale në ligj, parim dhe fakte”, duke pretenduar se për këtë arsye nuk mund të konsiderohet i qëndrueshëm.
Manchester City vijon të mohojë akuzat e ngritura nga Premier League dhe thekson se gjatë procesit ka paraqitur një numër të madh provash në mbështetje të qëndrimit të klubit.
Çështja është rezultat i një hetimi shumëvjeçar dhe përfshin gjithsej 130 akuza, që lidhen me periudhën 2009-2023.
Sipas gjetjeve të Komisionit të Pavarur, City u shpall fajtor për 114 nga 115 akuzat fillestare, ndërsa akuzat e tjera të ngritura më vonë e çuan numrin total në 130.
Në qendër të hetimit janë pretendimet për mosdhënie të informacionit të saktë financiar, pagesat ndaj trajnerëve dhe lojtarëve, respektimin e rregullave të UEFA-s dhe Fair Play-t Financiar, si dhe rregullat e qëndrueshmërisë financiare të Premier League. Një pjesë e veçantë e çështjes lidhet edhe me akuzën për mosbashkëpunim me hetimin.
Sipas përfundimeve të komisionit, klubi kishte përdorur marrëveshje tregtare të cilësuara si fiktive për të rritur artificialisht të ardhurat dhe për të fshehur kosto që arrinin në më shumë se 900 milionë paund gjatë një periudhe nëntëvjeçare. Manchester City i ka kundërshtuar këto përfundime.
Klubi ka bërë të ditur se do të respektojë procesin ligjor, por nuk pritet të japë detaje të tjera për sa kohë procedurat janë ende në zhvillim.
Sipas afateve të përcaktuara për procesin e apelimit, shqyrtimi duhet të përfundojë brenda 12 javësh nga depozitimi i apelimit. Kjo e vendos fundin e procesit rreth fundit të dhjetorit, ndërsa një seancë dëgjimore mund të zhvillohet gjatë muajit dhjetor. Pas përfundimit të shqyrtimit, komisioni do të ketë një periudhë të përcaktuar për të nxjerrë vendimin përfundimtar.
Nëse vendimi ndaj Manchester City-t konfirmohet, klubi mund të përballet me sanksione të ndryshme, përfshirë zbritje pikësh, gjoba financiare apo edhe përjashtim nga Premier League. Megjithatë, çdo masë konkrete do të përcaktohet vetëm pas përfundimit të procesit dhe vendimmarrjes përfundimtare.
Saga ligjore mes Manchester City-t dhe Premier League, e cila nisi në vitin 2018, tashmë ka hyrë në një fazë të re. Klubi ka zgjedhur të përdorë të drejtën e apelimit për të kundërshtuar gjetjet e Komisionit të Pavarur.