Edicioni i 4-t i “Vajzë Fest”, kujtesë për “analistët” gjithçka-njohës dhe një thirrje: Mos na e bëni pis festën

Në datat 13, 14 dhe 15 gusht, fshati Vajzë i Bashkisë Selenicë (Qarku Vlorë) u kthye sërish në kryeqendrën e mallit, traditës dhe bashkimit. Edicioni i 4-t i “Vajzë Fest” konfirmoi se kjo veprimtari nuk është më thjesht një aktivitet kalendarik, por një traditë e skalitur në shpirtin e trevës sonë.

Ishte një takim i vërtetë brezash. Vajzotët, kudo që jetojnë e punojnë, lanë çdo punë e angazhim për t’u mbledhur në tokën e të parëve, për të festuar, qeshur e gëzuar së bashku si një familje e madhe.

Krenarë për bijtë e Vajzës dhe miqtë tanë

Në këtë festë, si çdo vit, morën pjesë dhjetëra bij e bija të Vajzës. Pavarësisht se ku jetojnë apo çfarë detyrash shtetërore e profesionale mbajnë, atë fundjavë të gjithë ishin të barabartë: bij të këtij fshati.

Me këtë ndjenjë ishte i pranishëm edhe Sokol Sadushi. Për cinikët e ekraneve dhe portaleve që kërkojnë hije pas çdo hapi, u kujtojmë: Sokoli në Vajzë nuk erdhi si Kryetar i Gjykatës së Lartë. Erdhi si djalë i fshatit Vajzë, si një nga promotorët më të mëdhenj të kësaj feste që nga dita e saj e parë.

Po ashtu, festën tonë e nderuan edhe të ftuar të tjerë, mes të cilëve edhe Kryeministri Edi Rama. Ftesa për të nuk ishte një ftesë protokollare pushteti, por *një ftesë si mik i Vajzës* – dhe si i tillë u prit e qëndroi deri në fund mes njerëzve tanë.

Një mesazh për “analistët” gjithçka-njohës të studiove dhe portaleve

Fatkeqësisht, vumë re se disa “analistë” e “gjithçka-njohës” , aspak njohës të historisë së fshatit Vajzë, që nuk njohin as gurin, as traditën e as shpirtin e Labërisë, u përpoqën ta anatemojnë festën tonë. Përmes komenteve cinike e të pabazuara, ata u përpoqën të thurin intriga politike aty ku ka vetëm frymë zemre, këngë labe, valle e dashuri vëllazërore.

Për këta gjithçka-njohës që ushqehen me helm, kemi vetëm një mesazh të qartë:

MOS NA E BËNI PIS FESTËN!

Dhe merreni si shembull ta festoni edhe ju në vendet nga vini, pasi kemi bindjen se edhe vendlindjet tuaja janë po aq patriotike dhe mikpritëse sa edhe Vajza.

“Vajzë Fest” nuk është as e politikanëve, as e pushtetit, as e fraksioneve. “Vajzë Fest” është e banorëve, e të larguarve që kthehen te rrënjët, e fëmijëve që mësojnë se nga vijnë, dhe e miqve të mirë që respektojnë bujarinë tonë.

Lebërit e dinë mirë si ta ndajnë detyrën nga fshati, shtetin nga mikpritja, dhe politikën nga festa. Ndaj, mbajini intrigat tuaja larg oborrit tonë! Lërini njerëzit të gëzojnë lirshëm me gjithçka ata ndjejnë se i gëzon!

Ju faleminderit nga zemra të gjithë atyre që kontribuan, morën pjesë dhe i dhanë shpirt Edicionit të 4-të.

Vajza festoi dhe do të festojë gjithmonë kryelartë!