Jo arrestim, por hetime për Saimir Tahirin
Parlamenti votoi. 75 vota kundër arrestimit të ish-ministrit. Parlamenti në Tiranë rrëzoi kërkesën e Prokurorisë për arrestimin e ish-Ministrit të Brendshëm, Saimir Tahiri. Pas vendimit, opozita braktisi Parlamentin. Deputetët e Kuvendit të Shqipërisë votuan të mërkurën (25/10/ 2017) me votim të hapur për kërkesën e Prokurorisë lidhur me marrjen e autorizimit për arrestimin e ish-Ministrit të Brendshëm, Saimir Tahiri. Me 75 vota kundër të maxhorancës socialiste dhe 60 vota pro të opozitës kjo kërkesë u hodh poshtë. Përveç votës së saj pro arrestimit, opozita qëndroi në Parlament me pankarta në duar ku shkruhej: “Qeveri e drogës”, “Qeveri e krimit”, “Qeveri mafioze”dhe braktisi seancën pas rezultatit të votimit.
Edhe pse kërkesa për arrestim u hodh poshtë, Prokuroria ka të drejtë të fillojë hetimet që sot hetimet ndaj Saimir Tahirit duke i kontrolluar banesën dhe sendet e tij personale, si i dyshuar për lidhje me grupin kriminal të trafikimit të lënëve narkotike nga Shqipëria në Itali, të kryesuar nga vëllezërit Habilaj, kushërinj të largët të Tahirit.
Rrëzim i paralajmëruar i kërkesës së Prokurisë për arrestimin e Tahirit
Rrëzimi i kërkesës së prokurorisë për të marrë nga Parlamenti autorizim për arrestimin e Tahirit nuk është surprizë. Ai ishte i pritshëm pasi Këshilli për Mandatet dhe Imunitetet nuk i konsideroi prova, përgjimet e bëra të bisedave të anëtarëve të grupit kriminal Habilaj, të kryera nga autoritetet italiane ku përmendej vetëm emri i ish-Ministrit të Brendshëm.
Pas këtij qëndrimi të Këshillit rrëzimi i kërkesës së prokurorisë ishte i paralajmëruar. Maxhoranca socialiste në votimin e sotëm, me shumicë të thjeshtë të deputetëve të pranishëm në seancë plenare kishte 74 votat e saj. Edhe pa votën e Tahirit, deputet i lirë, edhe pa një votë kundër arrestimit të një deputeti të pavarur, e cila e ngriti numrin e votave kundër në 75 , maxhoranca socialiste kishte shumicen për të vendosur kundër arrestimit.
Opozita – Mosarrestimi i Tahirit, pengesë për drejtësinë
Dy raportet e Këshillit të Mandateve dhe Deputetëve për ҫështjen Tahiri u paraqitën në seancën e sotme parlamentare. Në raportin e saj, opozita kishte argumentuar qëndrimin e saj pro marrjes së autorizimit nga Parlamenti për arresimin e Tahirit me konsiderimin e përgjimeve nga autoritetet italiane si “prova të mjaftueshme” dhe me bindjen se ” mos arrestimi i tij përbën rrezik për prishjen e provave”.
Kurse maxhoranca socialiste në raportin e saj të paraqitur po sot argumentoi që provat janë të pamjaftueshme për të dhënë autorizimin e arrestimit dhe se kërkesa e prokurorisë ka sfond politik në këtë fazë të zhvillimit të hetimeve. Deputeti opzitar i PD, ish Enkelejd Alibej kundërshtoi raportin e deputetëve socialistë në Këshillin e Mandateve dhe Imuniteteve, lidhur me provat duke iu referuar, sipas tij, ligjit.
“Ligji nuk kërkon që Parlamenti të vërtetojë cilësinë e provave. Parlamenti nuk duhet të kryejë procesin e administrimit të provave pasi kjo është ekskluzivisht kompetencë e Prokurorisë dhe Gjykatës, që vendosin nëse duhet ngritur akuza dhe nëse i pandehuri duhet deklaruar fajtor ose jo fajtor”
Tahiri- Të drejtën do ta gjej para drejtësisë
Vetë ish-Ministri i Brendshëm, Tahiri konfirmoi edhe sot gadishmërinë e tij për t’u hetuar nga Prokuroria lidhur me dyshimet e saj për lidhjet e tij me grupin kriminal të trafikimit të cannabis sativa nga Shqipëria në Italia. “Nuk pres ta gjej të drejtën këtu, në sallën e Parlamentit, por aty ku më takon, para drejtësisë dhe qytetarëve” tha ai sot në Parlament.
Hetimi i Prokurorisë do të fillojë me kontrollin e banesës së ish- Ministrit të Brendshëm dhe deputetit të lirë Tahiri. Ende nuk dihet nëse largimi i opozitës nga seanca e sotme plenare parathotë bojkotin e Parlamentit prej saj.
