Televizioni më i madh në SHBA, Fox News, në vitin 20016 paralajmëroi se skandali i fotos së kryeministrit të Shqipërisë me presidentin e SHBA, Barak Obama, do të trondisë politikën në Shqipëri. Në vijim, artikulli në Fox News
Nga Perry Chiaramonte, Fox News
Një çështje federale që përfshin një shofer në New Jersey, njeriun më të fuqishëm në botë dhe Kryeministrin e Shqipërisë, Edi Ramën, kërcënon të tronditë korridoret e pushtetit të Shqipërisë.
Kryeministri shqiptar Edi Rama mund të përballet me ndjekjen penale që vjen nga një dhurim i paligjshëm në fushatën e Presidentit Obama.
Zyrtarisht, Bilal Shehu ishte një dhurues i madh në fushatën e Presidentit Obama për vitin 2012, duke hedhur 80,000 dollarë për vete dhe gruan e tij për të marrë pjesë në një mbledhje fondesh në San Francisko.
Por Shehu nuk mori gruan; por Edi Ramën, i cili ishte kandidat për kryeministër në Shqipëri. Policia federale thotë se ato ishin paratë e Ramës, për të bërë një foto me Presidentin Obama, të cilën do ta përdorte për fushatën e tij në zgjedhje.
Bilal Shehu e pranoi fajësinë më 29 qershor që me vetëdije dhe me dashje ka dhuruar kontribute dhe dhurime të huaja dhe mund të përballet me vite burg dhe 250,000 dollarë gjobë nëse dënohet më 5 tetor.
Opozita shqiptare ka deklaruar se paratë kanë ardhur nga trafiku drogës, dhe i kanë kërkua Prokurorisë të nisë përndjekjen penale ndaj Edi Ramës.
“Edi Rama ka kryer të paktën tre vepra penale”, tha ish-deputeti demokrat Eduard Halimi për Associated Press.
Sipas dokumenteve të çështjes Shehu, i cili u hetua nga FBI, ai pranoi se ka marrë para nga një shtetas i huaj përmes një transferimi në llogarinë e tij bankare. Më pas, ai ia kaloi një komiteti për mbledhjen e fondeve, duke fshehur origjinën e tyre të vërtetë.
Emri i Ramës nuk u përmend në këtë rast. Në dokumente thuhet se “shtetasit të huaj” nuk iu lejua hyrja në mbledhjen e fondeve në San Francisko, por iu lejua të bënte një foto me Presidentin Obama.
Sipas Ligjit amerikan për Fushatën Zgjedhore Federale, asnjë shtetas i huaj nuk mund të dhurojë ose shpenzojë para për zgjedhje lokale, shtetërore ose federale në SHBA. Përjashtim bëjnë vetëm shtetasit që kanë leje të përhershme qëndrimi në Amerikë.
Ndërsa hetimi në SHBA po përfundon, historia vazhdon të “trondisë” politikën shqiptare.
“Asnjë shqiptar sot nuk beson se Rama nuk ka frikë nga gjyqtarët dhe prokurorët e pavarur,” deklaroi kreu i Partisë Demokratike Kombëtare Lulzim Basha.
“Skandali amerikan për Edi Ramën. Gjykata e Nju Jorkut zbuloi se ai pagoi ilegalisht 80.000 dollarë për të bërë një foto me Obamën”,- tha ish-deputeti demokrat Gent Strazimiri.
Prokurorët në Shqipëri kanë afat deri në fund të korrikut të kryejnë një hetim kundër Ramës, thuhet në një shkrim të balkaninsight.
Albi Serani, zëdhënës i Prokurorit të Përgjithshëm, tha për median “balkaninsight” se, në përputhje me procedurat standarde, një hetim i tillë zgjat rreth një muaj.
“Gjatë kësaj kohe, prokurorët duhet të vendosin nëse ka ndonjë indikacion për ndonjë element kriminal në këtë çështje, më pas ata nisin hetimin, ose rrëzojnë kërkesën,” tha ai.
Përktheu: Lindita Kokoli