Sokol Balla: Frika dhe ankthi që la pas Donald Trump

Nga Sokol Balla –

Më në fund bota po merr frymë sërish. Më në fund Europa do të ketë një mik në Shtëpinë e Bardhë. Kështu tha Presidentja e Komisionit Europian Ursula Von der Leyen ndërsa Donald Trump la për herë të fundit Shtëpinë e Bardhë, për të shkuar në Florida, ku me gjasë do të luajë golf dhe siç premtoi në mesazhin e tij të fundit, të përgatisë rikthimin.

Një rikthim që do ishte hera e parë, sic ishte hera e parë që një president amerikan nuk njihte zgjedhjet, që nuk njihte koronavirusin e pandeminë, një president amerikan që për herë të parë guxoi të nxiste votuesit e tij të sulmonin Kongresin amerikan. Trump ishte Presidenti i shumë herëve të para dhe miliona veë në gjith botën shpresojnë në fakt që këto 4 vjet të tija në Shtëpinë e Bardhë, të jenë hera e tij e fundit.

Tani të gjithe në, kombet e vogla të ketij globi shohim me ankth, nëse Biden do të zgjedhë të bejë paqe me amerikanët që nuk e votuan, apo do t’i përqafojë qasjen globale dhe përqafimi i tij të na arrijë për shembull edhe neve në Ballkan, aty ku Trump na uli me zorr dhe pa kushte në një tavolinë, me ata që na kanë vrarë, e prerë e as nuk na kanë kërkuar falje. Ështe e sigurt që shqiptaret kanë tek Joe Biden një mik të mirë, por ai ka hallet e veta, dhe në një moshë të thyer që i hap rrugë Kamala Harris që të bëhet presidente më shpejt sesa e kishte ëndërruar, sot nuk jemi të sigurt, nëse Amerika do ketë kohë të merret edhe me ne. Gjithsesi ta mbyll me nje notë pozitive: Se me ringritjen e saj brenda natës së 6 janarit, tempulli i demokracisë së paku qëndroi në këmbë.

Të shpresojmë se dielli i saj që shkelqeu sot mbi Kapitol Hill të arrijë të na ngrohë dhe të na mbrojë nga ngrica siberiane, që ka vite që troket fort në derën tonë.