Zbulohen prapaskenat/ LDK kërkon Presidentin për Vjosa Osmanin, kurse Kurti i ofron…

Seanca për konstituimin e Kuvendit të Kosovës pritet të vijojë nesër ( 8 gusht) në orën 11:00, ndërsa përplasjet politike mes Lëvizjes Vetëvendosje dhe Lidhjes Demokratike të Kosovës vazhdojnë për çështjen e postit të Presidentit.

Takimi i fundit mes liderit të Vetëvendosjes, Albin Kurtit dhe kryetarit të LDK-së, Lumir Abdixhiku, nuk solli një marrëveshje për zgjidhjen e ngërçit institucional. Palët mbeten të ndara për mënyrën se si duhet të përcaktohet kandidatura për President.

Kurti ka deklaruar se rezultati i zgjedhjeve nuk i jep mundësi Vetëvendosjes që këtë post t’ia ofrojë LDK-së, e cila kërkon që presidenti të jetë Vjosa Osmani. Sipas tij, alternativa e propozuar nga Vetëvendosje është përfshirja e LDK-së në qeverisje përmes posteve ministrore.

Abdixhiku ka theksuar se LDK-ja e konsideron postin e Presidentit si një element të rëndësishëm për ruajtjen e balancës institucionale dhe se një marrëveshje nuk mund të arrihet pa ndryshuar qëndrimin e palës tjetër. Gjatë ditëve të fundit, drejtuesit e dy partive janë takuar disa herë për të gjetur një zgjidhje për krijimin e institucioneve të reja, por deri tani negociatat kanë dështuar. LDK kërkon Vjosa Osmanin, kurse Kurti një tjetër nga LDK, por nuk ia thotë emrin.

Afati kushtetues për konstituimin e Kuvendit përfundon të premten në mesnatë. Vetëvendosje ka numrat e nevojshëm për krijimin e Kuvendit dhe qeverisë, por zgjedhja e Presidentit kërkon një shumicë prej 80 deputetësh në sallë për kuorum. Nëse kjo nuk arrihet, Kosova mund të përballet me zgjedhje të reja.