Akoma nuk ka datë se kur do të mblidhet Këshilli i Mandatëve

Mbledhja e Këshillit të Mandateve për të shqyrtuar kërkesën e SPAK u mbyll pa caktuar një datë se kur do të mblidhet për të shqyrtuar kërkesën e arrestimit të Belinda Ballukut. “Mesa kuptova Edi Rama në 20 minuta nuk iu përgjigj në telefon, Peleshit. Është e rëndë që Kuvendi të bëhet pengesë e ti japë kohë Ballukut të ketë më shumë kohë për të intimiduar dëshmitarët”,-tha kreu i grpit parlamentar të PD, Gazment Bardhi në një deklaratë për median nga Kryesia.

Sipas Bardhit, kërkesa e mazhorancës për një muaj kohë për shqyrtimin e materialeve nuk ka asnjë bazë ligjore dhe bie ndesh me praktikat e mëparshme të Kuvendit. Ai solli si shembull rastin e ish-zëvendëskryeministrit Arben Ahmetaj, për të cilin, sipas tij, kishte rreth 15 mijë faqe materiale dhe deputetëve iu lanë vetëm 48 orë kohë për shqyrtim.

“SPAK ka qenë i qartë se edhe çështja e Ballukut është urgjente, pasi ka vlerësuar se po intimidohen dëshmitarët. Një person që shkoi në prokurori dhe tregoi të vërtetën është intimiduar nga e pandehura Balluku. Nuk mund t’i japim kohë që të intimidojë të gjithë dëshmitarët”, deklaroi Bardhi. Sipas tij, mazhoranca po kërkon dy javë kohë vetëm për të hartuar raportin e Këshillit të Mandateve, çka do ta shtyjë shqyrtimin e çështjes deri në fund të muajit shkurt. “Me këto afate, deri në shkurt provave dhe dëshmitarëve do t’u jetë bërë dëm i pariparueshëm”, paralajmëroi Bardhi. Pra për sot mbledhja mbaroi. Akoma nuk ka datë për mbledhjen tjetër.