Gratë do të dalin në pension këtë vit 2 muaj më të mëdha se vjet.
Me nisjen e 2026-ës rritet edhe mosha e daljes në pension për gratë nga 61 vjeç e 10 muaj që ishte në 2025-ën në 62 vjeç këtë vit.
Ndryshe me gratë, për burrat mosha e daljes në pension mbetet 65 vjeç dhe nuk do të ndryshojë deri në vitin 2032. Pas 2032-shit do të vijojë të rritet me 1 muaj për çdo vit, dhe sipas ligjit ‘Për Sigurimet Shoqërore’, deri në vitin 2056 mosha e daljes në pension si për burrat dhe për gratë do të barazohet në 67 vjeç.
Për të dyja gjinitë rriten edhe vitet e punës që në nisje të 2026-ës. Për të dalë në pension këtë vit dhe ta përfitosh atë të plotë duhet të kesh 39 vite punë ose 4 muaj më shumë sesa vitin që lamë pas. Vitet e sigurimit do të rriten gradualisht deri në 40 vite punë brenda 2029-ës.
Ndërkohë çdo qytetari i duhen të paktën 15 vite punë për të përfituar pension, por edhe ata që nuk plotësojnë asnjë kusht për të përfituar, pasi mbushin 70 vjeç u jepet pension social.
Ndërkohë që në nisje të vitit, ka nisur edhe zbatimi i formulës së re të shpërblimeve, e ndërtuar mbi bonuse mujore në varësi të masës së pensionit dhe kategorisë së tij, nëse është urban, rural, i pjesshëm, familjar apo invaliditeti.
Edhe këtë vit të ri do e shoqërojë halli i vjetër i skemës së pensioneve, në pritje të reformës së re, që është thënë se do të bëhet publike gjatë këtij viti. Prej gati 2 vitesh një grup pune është ngritur në qeveri mes disa institucioneve, me mbështetjen edhe të Bankës Botërore, që po punon për skemën e re, për t’ju përgjigjur ndryshimeve demografike, dhe gjithë ndryshimeve në tregun e punës.
Banka Botërore ka propozuar rishikimin e formulës si llogaritet pensioni, rritjen e moshës së daljes në pension, heqjen e përfitimeve suplementare, jo indeksime progresive, të bëhen skema me kontribute fikse e deri te fuqizimi i skemës private.
Skema e Pensioneve përtej demografisë, emigrimit dhe numrit të ulët të kontribuuesve po sfidohet fort nga nëndeklarimi i pagave, që prek direkt vlerën e kontributeve që paguhen për të punësuarin.
Skema e Pensioneve ka rezultuar deficitare, që kur ka hyrë në fuqi skema e re në vitin 2015, dhe për shkak të kontributeve të pamjaftueshme për të paguar pensionistët, diferenca mbulohet me buxhet të shtetit. Gjatë këtij 10-vjeçari janë shpenzuar nga buxheti i shtetit 2.5 miliardë euro për të shlyer të gjitha pensionet mujore.