Vjosa del sërish nga shtrati pranë Urës së Mifolit

Lumi Vjosa ka dalë sërish nga shtrati pranë Urës së Mifolit, duke shkaktuar përmbytje në zonën përreth. Sipas të dhënave më të fundit, niveli i ujit ka arritur në 7.45 metra, çka ka sjellë përmbytjen e tregut të kafshëve poshtë urës.

Situata paraqitet shqetësuese edhe në Memaliaj, ku niveli i Vjosës ka shkuar në 7 metra, ndërsa prurjet vijojnë me intensitet të lartë për shkak të reshjeve të vazhdueshme. Autoritetet paralajmërojnë se, nëse kjo situatë do të vijojë, niveli i lumit mund të rritet deri në 8.5 apo edhe 9 metra në orët në vijim.

Forcat e emergjencave civile dhe strukturat vendore janë në monitorim të vazhdueshëm të situatës, ndërsa u bëhet thirrje banorëve që jetojnë pranë shtratit të lumit të tregojnë kujdes dhe të jenë të gatshëm për marrjen e masave parandaluese, në rast përkeqësimi të mëtejshëm të situatës.