Lulzim Basha:30 qershori tregoi se me Edi Ramën nuk ka zgjedhje
Kryetari i Partisë Demokratike, Lulzim Basha në një bashkëbisedim me gazetarët nga selia blu, deklaroi se farsa e 30 qershorit u dënua dhe nga OSBE/ODIHR.
”Marrëzia e 30 qershorit tregoi se çfarë është i gatshëm të bëjë Edi Rama për pushtetin e tij. 85% e shqiptarëve refuzuan regjimin e krimit dhe grabitjes, 85% e shqiptarëve dje refuzuan Edi Ramën dhe treguan se e duan ndryshimin. Farsa dështoi, PD doli më e fortë dhe më e bashkuar nga 30 qershori.Opozita doli më e fortë dhe më e bashkuar nga 30 qershori”,- deklaroi Lulzim Basha.
Në deklaratën për mediat, kreu i PD-së deklaroi se me Edi Ramën nuk mund të ketë zgjedhje dhe as zgjidhje.
“30 qershori tregoi se me Edi Ramën nuk ka zgjedhje. Qëndrimi ynë do të jetë më i fortë dhe më i vendosur, me Edi Ramën nuk ka zgjedhje. Nuk ka zgjedhje pa dënuar krimet”,- deklaroi Lulzim Basha.
Pasditen e sotme, Basha zhvilloi një takim me aleatët ndërsa pritet që të zbulohet edhe vendimi i opozitës për aksionin në vijim kundër qeverisë.
Kreu i PD, deklaroi se votimet ishin të paligjshme dhe tani ky është fakt i pranuar nga të gjithë. Ai renditi dhe problemet kryesore që vuri në dukje raporti i OSBE/ODIHR.
“Sot OSBE-ODIHR dha gjetjet paraprake:
- 30 qershori nuk ishte në interesin e qytetarëve shqiptarë
- Votime pa zgjedhje
- Përjashtim i padrejtë i opozitës nga administrimi dhe monitorimi i zgjedhjeve
- Mos funksionim gjykatash
- Vendime të gabuara të KQZ-së
- Marrje e kompetencave të Gjykatës Kushtetuese dhe probleme të tjera serioze“,- tha Basha.
