Nga Spiten Prulli-
Votat brenda territorit të Republikës i fiton Edi Rama dhe PS. E majta mbetet mbizotëruese, duke mos harruar se PS është një “ushtri” e mirëorganizuar dhe kompakte kur vjen puna të kutia e votimit.
Eksperienca e këtyre 34 vitëve ka treguar se vetëm në mars 1992 fitoi e djathta, sepse edhe e majta donte ndryshimin.
Ndaj fitoi PD. Ndërsa viti 2005 erdhi për fajin e Fatos Nanos që ishte kryeministër dhe kishte humbur sensin e realitetit, aqsa solli Berishën në pushtet. Në vitin 2009 ishte Ilir Meta dhe LSI, parti krejtësisht e majtë, që hoqi votat e PS.
Zgjedhjet e tjera kanë treguar se fiton e majta. Ndonëse qeverisja 12 vjeçare ka krijuar qejfmbetje, dilema, hatërmbetje, por në fund prapë të majtët mblidhen të kutia për PS-në.
Edhe sondazhet e deritanishme tregojnë se PS dhe Rama kanë diferencë të ndjeshme me PD dhe Berishën.
Por këtë herë votojnë edhe 242 mijë emigrantë shqiptarë jashtë shtetit. Kjo është dilemë e madhe, pasi vota e tyre lëviz afro 15 mandate në qarqe. Të dyja partitë e mëdha deklarojnë se diasporën e kanë ata, sejcila për vete.
Shqiptarët që banojnë e jetojnë jashtë Shqipërisë nuk ndikohen nga interesat direkte politike. Themi në shumicën dërmuese, pasi edhe aty gjenden militantë partiakë.
Ata jetojnë në një botë tjetër, moderne, pavarësisht se i lidh zemra me Atdheun. Slogani që ka kapur Edi Rama duke prekur interesin e tyre, por jo vetëm, për pasaportë europiane si shqiptarë, mbetet prekës dhe interesant. Natyrisht që një pjesë kanë edhe pasaportën e shtetit ku jetojnë, por shumica e shqiptarëve përfiton nga kjo pasaportë.
Ndërkohë Berisha, edhe për faktin e moshës së tij 81 vjeçare, nuk prodhon shumë sinergji. Berisha duhej të kishte bërë aktin civil dhe patriotik që të kandidonte për kryeministër një emër tjetër nga PD, që të thithte elektoratin gri, siç quhet tashmë ata që nuk duan as Ramën dhe as Berishën.
Ndaj vota e diasporës do të vendosë nëse PS-ja do të marrë 1 milionë vota apo jo.