Mijëra e mijëra protestues po vijnë drejt Tiranës me autobuzë, furgona, trena dhe vetura

Mijëra vetë drejt Tiranës. Informacionet e korrespondentëve të “Koha Jonë” nga rrethet e vendit raportojnë se dhjetëra mijë qytetarë po nisen drejt Tiranës për të marrë pjesë në manifestimin para presidencës. Sipas korrespodentit te zonës Korçë-Ersekë, vargu i makinave me protestues e flamuj kuq e zi ka pushtuar rrugën nga Korça drejt Pogradecit e më pas për në Tiranë. Po kështu dhjetëra autobusë e furgona nga Saranda, Gjirokastra dhe zona e Tepelenës po udhëtojnë drejt kryeqytetit për në protestë.

Mësohet se nga Tropoja dhe nga Malësia e Madhe autobusët janë nisur drejt bulevardit kryesor të Tiranës. Po kështu mijëra jane nisur nga Berati, Elbasani, Vlorë dhe Fieri.

Makinat e protestuesve dallohen pasi kanë flamuj kuq e zi.

Ndërkohë policia ka ngritur kudo postblloqe kontrolli, por deri në këto momente nuk ka bllokuar asnjë protestues me pretekste të cilat i bën zakonisht policia kur ka mitingje kundër qeverisë.
Nga Durrësi po nisen ne këto momente një numër jashtëzakonisht i madh me qytetarë. Ndërkohë Lezha dhe Shkodra ndodhen duke udhëtuar drejt bulevardit kryesor në Tiranë.

Po kështu kryeqyteti do fillojë të lëvizë nga ora 16:00 me flamuj kuq e zi.

Emigrantët që kanë ardhur që dje janë në sheshin Skënderbej në pritje të ardhjes së mijëra të tjerëve nga rrethet.