Nga takimi në Oslo te investimet norvegjeze në Shqipëri, Berisha uron Mbretin Haakon VIII: Suksese në udhëheqjen e vendit

Sali Berisha ka reaguar për ndarjen nga jeta të Mbretit Harald të Norvegjisë, duke shprehur ngushëllimet për familjen mbretërore dhe duke uruar Princin e Kurorës Haakon për marrjen e fronit.

Në një reagim të publikuar prej tij, Berisha shkruan se Mbreti Harald, të cilin e cilëson si një personalitet të shquar, reformator dhe vizionar, u nda nga jeta në moshën 89-vjeçare në një spital të Oslos.

Ai kujton edhe një vizitë zyrtare në Norvegji në nëntor 2011, gjatë së cilës, sipas tij, pati një audiencë me Princin e atëhershëm të Kurorës Haakon dhe siguroi mbështetjen e tij për investimet norvegjeze në Shqipëri.

Postimi i plotë

Të dashur miq, Mbreti Harald i Norvegjisë, një personalitet i shquar dhe i respektuar si reformator e vizionar, u nda sot nga jeta në moshën 89-vjeçare në një spital të Oslos. Po sot, në fronin mbretëror të këtij vendi u ngjit djali i tij, Princi i Kurorës Haakon, i cili do të mbretërojë si Mbreti Haakon VIII.

Norvegjia një superfuqi energjitike, është vendi me investimet më të mëdha energjetike në Shqipëri, përmes dy kompanive të saj gjigante: Equinor (ish-Statoil) në projektin TAP dhe Statkraft në Kaskadën e Devollit.

Gjatë një vizite time zyrtare në nëntor të vitit 2011, pata rastin të pritem në një audiencë të veçantë nga Lartësia e Tij, Princi i Kurorës Haakon, dhe të siguroja mbështetjen e tij për këto investime të mëdha norvegjeze në Shqipëri.

I shpreh ngushëllimet e mia më të ndjera Mbretit Haakon VIII për ndarjen nga jeta të babait të tij, Madhërisë së Tij, Mbretit Harald, si dhe urimet më të mira e sukseset më të mëdha në udhëheqjen e kombit dhe të vendit të tij të madh.