Opozita: “Ahmetaj është arratisur nga Shqipëria”. Sqaron ish-zv/kryeministri: Sapo bleva një akullore vajzës në ish-Bllok!

Nga Redion Shtylla-

Në lidhje me ish-zv/kryeministrin Arben Ahmetaj po qarkullojnë shumë fjalë dhe hamendje se është arratisur. Disa deputetë të opozitës kanë thënë se ai ka ikur në Dubai.

Edhe sonte në syri.net u tha se Ahmetaj ka ikur në një shtet ku merr azil politik.

Ja se çfarë shkruan saktësisht syri.net:

Hetimi për aferën gjigante të korrupsionit me inceneratorët që ka futur në rreth edhe Arben Ahmetajn, u diskutua gjatë ‘Task Force’ në SYRI TV me Sonila Meçon. 

Gazetarja Anduena Llabani, gjatë diskutimit ka dhënë detaje në lidhje me largimin e ish-ministrit Ahmetaj jashtë Shqipërisë në vende ku pranohet edhe azili. 

Llabani theksoi gjatë diskutimit se, edhe disa oligarkë kanë nisur ti bëjnë presion Edi Ramës që të mos preket Arben Ahmetaj.

 “Ti mendon se Arben Ahmetaj është njeri që nuk ka bërë gjëra duke ndihmuar njerëz me influencë në këtë vend? Sigurisht që po, dhe janë ata të parët që janë hedhur në terren. Do të shkojnë disa emra në prokurori, e nuk do të shkojë Arben Ahmetaj. Ai ka nisur tratativat dhe kohët e fundit ka të dhëna, që ka dalë jashtë vendit në ato vende që pranojnë dhe azile. 

Të jesh e sigurtë që këta kanë edhe sigurinë që nuk do të bëhet asgjë. Ne kemi njerëz të cilët, janë me precedentë penalë, me para, që punojnë për pushtetin, që blejnë vota gjatë zgjedhjeve elektorale, të cilët njoftohen dy ditë para, që largohu ti bashkë me shokët e tu. 

Ne po flasim për njerëz që kanë influencë, që për shumë faktorë të rëndësishëm në këtë vend, edhe nga ata oligarkë pranë Ramës, që janë hedhur në mbrojtje, që Arben Ahmetajt ti garantohet një pafajësi juridike dhe largimi i tij nga vendi’, tha Anduena Llabani në SYRI TV.

Në lidhje me këtë se Arben Ahmetaj ka ikur nga Shqipëria, iu drejtova me sms ish-zv/kryeministrit duke e pyetur nëse jeni në Shqipëri apo jeni arratisur? Ai u përgjigj: “Sapo bleva tani një akullore për vajzën në ish-Bllok!”.