Paris, kjo është protestë!

Policia përdori gaz lotsjellës me shumicë dhe shkopinjë gome ndaj demonstruesve në Paris të shtunën. Kryeqyteti u paralizua për kohën që zhvillohej protesta, e cila herë pas here kalonte në dhunë.

Turma të mëdha u mblodhën për raundin e katërt të protestave mbarëkombëtare kundër reformës së planifikuar të pensioneve.

Marshimi i Parisit ishte pjesë e protestave në gjithë Francën ku qindra mijëra njerëz dolën për të vazhduar presionin ndaj qeverisë lidhur me planet e saj për reformën. Në fillim të kësaj jave, ligjvënësit francezë filluan një debat mbi projektligjin për pensionet, që parashikon mes të tjerash rritjen e moshës së pensionit nga nga 62 në 64 vjeç.

Është legjislacioni kryesor i mandatit të dytë të Presidentit Emmanuel Macron i cili ka thënë se reforma është “jetike” për të siguruar qëndrueshmërinë e sistemit të pensioneve. Por pakënaqësia e madhe popullore do të forcojë përpjekjet e sindikatave të punëtorëve dhe ligjvënësve të krahut të majtë në përpjekje për të bllokuar projektligjin.

Francezët kanë moshën më të re të daljes në pension mes vendeve të Organizatës për Bashkëpunim dhe Zhvillim ekonomik dhe sipas sondazheve një shumicë e konsiderueshme e francezëve duan ta ruajnë këtë përfitim.

Sipas vlerësimeve fillestare të raportuara nga gazeta Le Figaro, në Paris pjesëmarrja në protestë ishte 20% më e lartë në krahasim me protestën e fundit të së martës.

Ndërkohë qeveria është tërhequr për momentin nga forca e protestave të dhunshme, të cilat nuk do të ndalojnë deri në realimin e qëllimit të tyre.