Të martën nis rinumërimi i votave,Tirana dhe Fieri kontroll i plotë, kurse Durrësi vetëm 275 kuti

Zgjedhjet kanë mbaruar, dihet fituesi, por akoma humbësi kapet te manovrat e rinumërimit për të gjetur artifica për humbjen e thellë. Berisha insiston se nuk jep dorëheqjen nga kryetar i PD se, sipas tij, nuk kishte zgjedhje, por farsë. Nga ana tjetër Ilir Meta nga burgu urdhëroi analizën e PL që pse dolën kaq dobët.

Të martën pallati i Sportit “Farie Hoti” do të hapë dyert  jo për tifozët, por për politikën për të ndjekur rezultatin e një ndeshje që u mbyll me 11 maj, por që nuk pranohet nga Partia Demokratike.

Anëtarët e propozuar  nga opozita në KQZ i dhanë dritën jeshile hapjes së 2 mije e 240 kutive për t’i kaluar në një sitë të hollësishme verifikimi dhe rinumërimi.

96 kutitë e Elbasanit do të jenë të parat  që do të hapen,  por jo për tu rinumëruar,  por për të hetuar nëse treni bullgar është ndaluar në stacionin e Gramshit dhe Peqinit me 11 maj siç pretendon opozita.

Kësaj dileme do i japë  fund stafi i KQZ që do te krahasojë nëse në kutitë e përzgjedhura për hetim ka më shumë vota sesa zgjedhës që janë paraqitur në qendrat e votimit.

Pasi të  mbyllet hetimi për qarkun e Elbasanit do  nisë procesi maratonë i rinumërimit i të gjitha kutive të qarkut Tiranë dhe Fierit dhe 275 kutive te qarkut Durrës, ku fillimisht do të lexohet vota për partitë garuese e më pas në një raund të dytë do të numërohet vota e kandidatëve. Në kampin blu, ata  që humbën shpresojnë që fati ti buzëqeshë  pas pretendimeve se vota e tyre është trafikuar brenda llojit, por pritshmëritë e partisë dukshëm shkojnë në një kah të kundërt me atë të kandidatëve.

“Si përfaqësues ligjor i PD përfaqësoj vetëm interesin e Partisë Demokratike dhe qëllimin që ka PD për të faktuar farsën elektorale kandidatët e PD janë në të drejtën për të ngritur çdo lloj pretendimi që ka të bëjnë me rezultatin dhe renditjen e tyre në liste përfundimtare”, tha Logu.

“Partisë Demokratike iu krijua gjithë komoditeti për të gjetur provat dhe për t’i sjellë para KAS dhe nuk e bëri në asnjë moment, çdo pretendim ishte mbi hipoteza mbi denoncime në rrjete sociale”, tha Elena Xhina, përfaqësuese ligjore e PS në KQZ.

Por nga rinumërimi asgjë nuk lëviz në mandatet e PS, por mundet PD-ja të fitojë një mandat me tepër në Tiranë duke ia marrë Agron Shehajt.