Jeta e pandarë nga vepra dhe vepra e pandarë nga jeta, ky ishte shkrimtari Petro Marko

Në Muzeun Historik Kombëtar u bënë bashkë studiues të letrave shqipeve dhe dashamirës në përkujtim të shkrimtarit dhe studiuesit të madh shqiptar Petro Marko.

Në nder të veprës së tij personalitetet pjesëmarrës lartësuan gjithçka që ai shkruante dhe bënte në emër të letërsisë. Veprat e tij reflektojnë triumfin e dashurisë dhe të humanizmit njerëzor, ai arrin të mbetet i pamposhtur nga mizoritë e botës.

Namik Dokle, politikan dhe dramaturg, në fjalën e tij u shpreh se romanet e Markos hynë në elitën e personaliteteve më të shquara të kulturës shqiptare, që sollën risi të vërteta në traditën letrare shqiptare.

Dokle: Janë të rrallë ata shkrimtarë që kanë mundur të ruajnë aq me konseguencë dhe fanatizëm dinjitetin e krijuesit dhe të njeriut. E tillë ishte e gjithë Jeta e Petro Markos, jeta e pandarë nga vepra dhe vepra e pandarë nga jeta.

Petro Marko ishte shkrimtar shumë i popullarizuar dhe shumë i lexuar jo vetëm në Shqipëri, por kudo në trojet shqiptare.