Begaj pret Antonio Costën: Shqipëria po ecën me ritëm të shpejtë drejt anëtarësimit në BE

Presidenti i Republikës, Bajram Begaj, priti sot Presidentin e Këshillit Evropian, Antonio Costa.

Gjatë këtij takimi u vlerësua progresi i spikatur i vendit tonë në procesin e negociatave, përfshirë mbajtjen e Konferencës së 8-të Ndërqeveritare BE–Shqipëri, e cila konfirmoi përmbushjen e kritereve ndërmjetëse për Kapitullin 1 “Themeloret”.

“Reforma në drejtësi, forcimi i shtetit të së drejtës, lufta kundër korrupsionit dhe krimit të organizuar, si dhe përputhja e plotë me Politikën e Përbashkët të Jashtme dhe të Sigurisë së BE-së dëshmojnë se Shqipëria është një partner i besueshëm dhe i përkushtuar për t’u bërë pjesë e familjes evropiane”, u shpreh Kreu i Shtetit.

“Zgjerimi i BE-së në Ballkanin Perëndimor nuk është vetëm një proces integrimi, por edhe një investim strategjik për paqen, sigurinë dhe stabilitetin e gjithë kontinentit evropian.

Shqipëria është mirënjohëse për mbështetjen e fuqishme që Këshilli dhe Komisioni po i japin në këtë rrugëtim. Vendi ynë do të vijojë me ritëm të shpejtë dhe me rezultate konkrete në rrugën drejt anëtarësimit në Bashkimin Evropian. Jemi të bindur se reformat nuk i ndërmarrim vetëm për të përmbushur kërkesat e BE-së, por mbi të gjitha për të mirën e qytetarëve tanë”, tha Begaj.