Benet Beci: Shkodra kjo qendër në hartën e zhvillimeve turistike dhe kulturor, shkëlqen dhe renditet e para në “TEA Awards 2026″

Benet Beci ka ndarë me ndjekësit në rrjetet sociale një nga lajmet më domethënëse për promovimin e Shkodër si destinacion turistik, kulturor dhe sportiv në Shqipëri dhe rajon. Përmes një galerie fotografish dhe një mesazhi entuziast, kryebashkiaku bëri të ditur se qyteti është renditur ndër fituesit kryesorë të “TEA Awards 2026”, duke marrë tre çmime prestigjioze që e pozicionojnë Shkodrën në qendër të hartës së zhvillimeve turistike dhe kulturore.

Sipas publikimit të tij, Shkodra është vlerësuar me titujt:
“City of Sports & Adventures 2026”
“TEA’s Most Desirable Local Event 2026”
“TEA’s Most Desirable Art Fest 2026”

Këto çmime konsiderohen një vlerësim i drejtpërdrejtë për transformimin që qyteti ka përjetuar vitet e fundit në drejtim të organizimit të aktiviteteve kulturore, eventeve publike, sporteve në natyrë dhe promovimit të turizmit gjithëvjetor.

Në reagimin e tij, Benet Beci thekson se ky sukses nuk i përket vetëm institucioneve vendore, por është fryt i një pune të përbashkët mes komunitetit, bizneseve, artistëve, organizatorëve të eventeve dhe qytetarëve që po kontribuojnë për ta kthyer Shkodrën në një model zhvillimi urban dhe turistik.

Një nga elementët më domethënës të këtij vlerësimi është titulli “City of Sports & Adventures 2026”, që e identifikon Shkodrën si një qendër të sporteve dhe aventurës në rajon. Me liqenin, lumenjtë, Alpet, pistat natyrore dhe hapësirat për aktivitete sportive, qyteti po ndërton gjithnjë e më shumë profilin e një destinacioni që kombinon natyrën, turizmin aktiv dhe eksperiencat sportive. Kjo vlerësohet si një strategji moderne zhvillimi që synon të tërheqë jo vetëm turistët tradicionalë, por edhe ata që kërkojnë aventura, aktivitete outdoor dhe eksperienca autentike.

Po aq domethënës është edhe çmimi “TEA’s Most Desirable Art Fest 2026”, i cili vjen si një njohje për gjallërinë artistike dhe kulturore të qytetit. Shkodra, e njohur historikisht si djepi i kulturës shqiptare, po rikthen në vëmendje identitetin e saj artistik përmes festivaleve, ekspozitave, aktiviteteve muzikore dhe eventeve që kanë filluar të tërheqin vëmendjen e publikut vendas dhe të huaj.

Ndërsa çmimi “TEA’s Most Desirable Local Event 2026” dëshmon për suksesin e organizimit të aktiviteteve publike dhe eventeve qytetare, të cilat kanë kthyer Shkodrën në një qytet dinamik, me kalendar të pasur kulturor dhe turistik gjatë gjithë vitit.

Një tjetër moment krenarie për qytetin, sipas kryebashkiakut, është edhe vlerësimi i Tradita Gegë & Toskë si restoranti më i mirë, duke sjellë në qendër të vëmendjes edhe gastronominë tradicionale shqiptare dhe mikpritjen karakteristike shkodrane. Ky vlerësim shihet si një promovim i rëndësishëm për kulinarinë lokale, e cila po bëhet gjithnjë e më shumë pjesë e ofertës turistike të qytetit.

Në mesazhin e tij, Benet Beci e cilëson këtë arritje si rezultat të “një pune kolosale të të gjithëve për ta ngritur Shkodrën në nivelet më të larta, ashtu siç i ka hije”, duke nënvizuar ambicien për ta kthyer qytetin në një pikë referimi për kulturën, sportin, turizmin dhe mikpritjen shqiptare.

Këto vlerësime vijnë në një kohë kur Shkodra po përjeton një rritje të ndjeshme të interesit turistik, falë investimeve në hapësirat publike, promovimit të trashëgimisë kulturore dhe zhvillimit të eventeve që po i japin qytetit një identitet të ri bashkëkohor, pa humbur lidhjen me traditën dhe historinë e tij të pasur.

Albert Vataj