Berisha për Vlora Hysenin: Shërbëtore e Ramës dhe Vuçiçit, siguria e vendit është shembur totalisht

Teksa qytetarët protestuan para Kuvendit dhe brenda tij vijonte seanca plenare, Sali Berisha e cilësoi mbledhjen si një seancë të turpshme. Kreu i PD-së ngriti akuza të forta ndaj drejtimit të institucioneve të sigurisë, duke deklaruar se “siguria e vendit është shembur totalisht”. Ai pretendoi se ish-kryetarja e SHISH, Vlora Hyseni, është e lidhur me grupin kriminal që sipas tij drejtohet nga Ergys Agasi.

“Kjo seancë do të hyjë në histori si seanca e turpshme e mbledhur ndonjëherë. Sot Kuvendi mblidhet si parlamenti i Ergys Agasit”, deklaroi Berisha. Duke iu referuar më herët deklaratave të tij për Agasin, ai tha: “Në këtë sallë kam deklaruar se Agasi është mafiozi më i rrezikshëm i Europës”.

Berisha kritikoi emërimin e Vlorës Hyseni në krye të SHISH, duke e cilësuar atë “aktin më të papërgjegjshëm ndaj sigurisë së vendit” dhe duke pretenduar se ajo kishte një “rol të dyfishtë”. Ai akuzoi drejtues të institucioneve për bashkëpunim me persona të krimit, duke thënë se “njeriu që kishte detyrë sigurinë e vendit dhe qytetarëve të vendit, bashkëpunonte me hanxharët e krimit dhe ishte ushtare e tyre”.

Nga ana tjetër, Sali Berisha ka akuzuar Ergys Agasin se ka pasur rol në vendimmarrjen e Hysenit, duke pretenduar se ai ndikonte në çështje që lidhen me deputetë të mazhorancës. Sipas Berishës, Hyseni vepronte “nën drejtimin e Agasit” dhe ishte personi që, me porosi të tij, merrte vendime për shkarkime dhe thërriste deputetë në zyrë.

“Anëtare e një organizate më të rrezikshme kriminale, njeriu që lëshonte në duart e bandave çdo sekret të këtij shteti, që me porosi të Ergys Agasit shkarkonte secilin prej jush, njeriu që ju thërriste ju në zyrë”. Ai e lidhi këtë situatë me akuzën se “është shembur piramida e sigurisë”, duke e cilësuar emërimin e Hysenit në krye të SHISH si një akt të papërgjegjshëm ndaj sigurisë së vendit.