Sekretari i Përgjithshëm i PS, Blendi Klosi, thotë se protesta ka nisur si një reagim qytetar, por sot është shndërruar në një organizim me natyrë të qartë politike. Për të nëse qëllimi i protestuesve është rrëzimi i qeverisë Rama, atëherë ata duhet të përgatiten për përballjen elektorale.
”Protesta filloi me Zvernecin, ndërsa sot është një protestë me një grupim të pastër politik. Dimensioni i lirisë së protestës është thjeshtuar shumë dhe sot ka një grup njerëzish që e mbështesin atë. Nëse duan rrëzimin e qeverisë, duhet të përgatiten për garën elektorale. Qeveritë nuk rrëzohen pa u rrëzuar mazhoranca.
Do të ishte një zhvillim pozitiv nëse nga protesta do të krijohej një grupim politik me ide dhe programe konkrete. Do të ishte një arritje për protestën nëse do të kishim përballë një ekip që do të garantonte me idetë dhe politikat e veta një alternativë në garën e ardhshme elektorale.
Aty do të shfaqeshin lidershipi dhe programet e tyre. Deri tani nuk kemi një kërkesë më të spikatur sesa largimi i qeverisë. Besoj se mënyra për të ndryshuar një qeveri janë zgjedhjet. Forcat politike që synojnë të garojnë në zgjedhje kanë pak kohë për t’u organizuar. Kemi garën lokale pas një viti dhe pas tre vitesh garën e përgjithshme. Është pak kohë që një forcë politike të përgatitet dhe të vijë me një garë përballë nesh”,-tha në ”Të paekspozuarit”.