Damian Gjiknuri: Të hapur për të diskutuar ndryshimin e sistemit zgjedhor

Zëvendëskryetari i Komisionit Parlamentar për Çështjet Ligjore dhe Administratën Publike,  Damian Gjiknuri, deklaroi se Partia Socialiste është e gatshme të diskutojë ndryshimin e sistemit zgjedhor, në kuadër të punës së komisionit të posaçëm për Reformën Zgjedhore.

Në një prononcim për mediat pas ngritjes së komisionit,  Gjiknuri theksoi se çdo propozim është i hapur për diskutim:

“Herën e fundit ne e ndryshuam sistemin zgjedhor bazuar kryesisht në kërkesat e PD-së,  sepse edhe ndryshimi i formulimit dhe përbërjes së listës zgjedhore, një pjesë të mbyllur, një pjesë të hapur, është pjesë e sistemit zgjedhor. Ne jemi të hapur për të gjykuar çfarë do të jetë varianti më i mirë.”

I pyetur për mundësinë e depolitizimit të Komisionit Qendror të Zgjedhjeve (KQZ),  Gjiknuri tha se nuk ka një opinion të formuar për këtë çështje, por theksoi se depolitizimi i administratës zgjedhore ka qenë një kërkesë e hershme e Partisë Demokratike.

Ne kemi arritur një formulë kompromisi në vitin 2020 me PD-në,  fatkeqësisht nuk u realizua,  por kemi një bazë të mirë solide. Ndërsa KQZ në vetvete është një organ në dukje i depolitizuar. Anëtarët e saj nuk hiqen dhe emërohen nga partitë politike,  kanë një mandat të përcaktuar në ligj, kështu që puna e tyre funksionon në mënyrë të pavarur.”

Ai shtoi se,  pavarësisht ndikimeve të mundshme politike,  vendimmarrja duhet të jetë transparente dhe gjithëpërfshirëse.