Deputetët e Partisë Demokratike janë paraqitur ditën e sotme në komisionet parlamentare, por kanë mbajtur të njëjtin qëndrim kundër vijimit normal të punës, duke u larguar nga mbledhjet.
Demokratët kanë dënuar dhunën e ushtruar ndaj qytetarëve gjatë protestës dhe i kanë kërkuar Prokurorisë të hetojë të gjithë zinxhirin drejtues të Policisë së Shtetit. Sipas tyre, në këto kushte nuk mund të ketë normalitet parlamentar.
Gjatë mbledhjes së Komisionit të Ligjeve, deputeti demokrat Oerd Bylykbashi akuzoi Policinë se po përdor arrestimet dhe ndalimet si mjete intimidimi për të penguar qytetarët të marrin pjesë në tubime.
“Sot, Prokuroria duhet të fillonte hetimin e të gjithë zinxhirit komandues të Policisë së Shtetit. Kjo nuk do të kalojë pa pasoja. Të gjithë do të përgjigjen një për një, me koston e spastrimit të plotë nga këta individë që përdorin dhunën, si në kohën e sambistave të komunizmit”, deklaroi Bylykbashi.
Nga ana tjetër, deputeti socialist Ulsi Manja iu përgjigj akuzave të opozitës, duke deklaruar se selia e Partisë Demokratike është një seli dhune.
“Kemi një jetë që merremi me atë seli. Nuk presin qytetarët që t’ia qajë hallin ajo seli”, tha Manja.