Deputetja e PD-së refuzon të bëhet pjesë e Sekretarisë së Përkohshme në Kuvend

Në nisje të sesionit të ri parlamentar, Kuvendi i Shqipërisë ka formuar Sekretarinë e Përkohshme, siç parashikohet nga rregullorja, me pjesëmarrjen e tre deputeteve më të reja. Mariana Koçeku dhe Zegjine Caushi, përfaqësuese të Partisë Socialiste, janë ulur në vendet e tyre përkatëse, por deputetja demokrate Klodiana Çapja ka vendosur të mos i bashkohet këtij formati.

Me këtë vendim, Çapja ka bojkotuar detyrën që i takon në mënyrë automatike bazuar në përbërjen e re të Kuvendit, duke dërguar një sinjal politik në një moment kur pritet zgjedhja e byrosë së re parlamentare.

Refuzimi i saj për të marrë pjesë në Sekretarinë e Përkohshme shihet si një veprim simbolik që ndjek linjën e qëndrimeve kritike të Partisë Demokratike ndaj zhvillimeve të fundit në jetën parlamentare.