Kreu i Kuvendit, Niko Peleshi ka reaguar ndaj akteve të dhunës edhe këtë të dielë, duke dënuar sulmet ndaj institucioneve, zjarrvëniet dhe shkatërrimin e pronës publike e private. Në reagimin e tij, Peleshi thekson se dhuna nuk ka lidhje me të drejtën e studentëve dhe të rinjve për të protestuar dhe për të kërkuar më shumë të drejta e mundësi. Ai nënvizon se të rinjtë janë e ardhmja e vendit dhe kanë të drejtë të kërkojnë një të ardhme të barabartë me bashkëmoshatarët e tyre në Bashkimin Europian.
Postimi i plotë
DHUNA NUK KA VEND NË DEMOKRACI!
Komisioni Europian dënon qartë zjarrvëniet, sulmet ndaj institucioneve dhe shkatërrimin e pronës publike e private gjatë protestave në Shqipëri.
Sulmet ndaj institucioneve, djegia dhe shkatërrimi i pronës nuk kanë të bëjnë as me studentët, as me të drejtën e tyre për të protestuar.
Të rinjtë janë e sotmja dhe e nesërmja e Shqipërisë. Ata kanë të drejtë të kërkojnë me zë të lartë më shumë të drejta, më shumë mundësi. Kanë të drejtë të ëndërrojnë një të ardhme të barabartë me moshatarët e BE-së.
Por dhuna nuk është rruga.
Le të ulemi me njëri-tjetrin. Pa paragjykim, pa mllef. Çdo orë që kalon e bën më të vështirë dialogun.
Mbase mund të mos bihet dakord, por duhet folur. Duhet dëgjuar.
T’i japim dorën njëri-tjetrit SOT!
Jemi për një qëllim.
Për Shqipërinë.