”Diçka është çmendur këtu”, ish-ministri Lleshaj për arrestimin e kreut të SHISH: Çarje e madhe në sistemin e inteligjencës

Ish-ministri i Brendshëm, Sandër Lleshaj e ka cilësuar arrestimin e kreut të Shërbimit Informativ të Shtetit si një ngjarje të paprecedentë, duke theksuar se situata duhet trajtuar me seriozitet dhe nuk mund të shihet vetëm si një çështje penale. ”Ndalimi i Shefit të Shërbimit Informativ është një ngjarje e paprecedentë. Ngado që ta marrësh, diçka është çmendur këtu: ose është çmendur shefja e Shërbimit Informativ ose është çmendur SPAK-u, ose janë çmendur të dy. Është një gjëmë e madhe. Shefi i Shërbimit Informativ të Shqipërisë është arrestuar për bashkëpunim me banda kriminale. Të paktën ky është dyshimi i Prokurorisë së shtetit shqiptar dhe i një gjykate shqiptare. Ndaj, kjo ngjarje meriton seriozitet në trajtim”,-tha në ”A2cnn”

Ai ngriti shqetësimin për ruajtjen e sekretit dhe konfidencialitetit të informacionit të mbledhur nga shërbimi. “Duhet të dimë që Shërbimi jeton nga konfidenca, nga sekreti”, theksoi Lleshaj, duke shtuar se rrjedhja e informacioneve mund të ketë pasoja edhe për bashkëpunëtorët e shërbimit. Në këtë kontekst, ish-ministri kërkoi një reformim të thellë të SHISH-it, duke argumentuar se kjo nevojë ekziston prej shumë vitesh.

“Duhet një reformim dhe është dashur jo sot, por është dashur para 30 vitesh. Nuk është bërë”, deklaroi Lleshaj në ”A2cnn”. Ai kritikoi gjithashtu kuadrin ligjor mbi të cilin funksionon institucioni, duke pretenduar se ligji aktual nuk është përshtatur me Kushtetutën e vitit 1998. “Ky ligj i Shërbimit nuk ka lidhje me Kushtetutën tonë. I bazohet, i referohet një Kushtetute tjetër, të rrëzuar, dhe nuk është prekur kurrë”, tha ai.

Një tjetër pikë e ngritur nga Lleshaj ishte kontrolli mbi shërbimin inteligjent. Sipas tij, SHISH duhet t’i nënshtrohet mekanizmave të qartë të mbikëqyrjes. Lleshaj theksoi se këto mekanizma janë të domosdoshëm për të ruajtur ekuilibrin mes sigurisë kombëtare dhe të drejtave të qytetarëve. “Gjithmonë ka një balancë midis sigurisë dhe lirisë individuale”, tha ai, duke e konsideruar reformimin e sistemit të inteligjencës një çështje me rëndësi kombëtare.