Forcimi i shërbimeve sociale dhe shëndetësore për të moshuarit, me më shumë kujdes në banesë dhe shërbime të specializuara, është në fokus të politikave për moshën e tretë. Nga shërbimi në banesë dhe Linja e Këshillimit, tek institucionet rezidenciale dhe ngritja e Shërbimit të Geriatrisë, po ndërtohet një rrjet i integruar kujdesi, që synon t’u përgjigjet nevojave të të moshuarve në çdo nivel, më pranë tyre dhe me shërbime të dedikuara.
Në kuadër të Ditës Ndërkombëtare të të Moshuarve dhe përmbylljes së projektit “eldEARLY – Përmirësimi i Sistemit të Përkujdesit Social për të Moshuarit në Shqipëri”, Shërbimi Social Shtetëror organizoi Konferencën Kombëtare, duke sjellë në vëmendje rëndësinë e garantimit të një përkujdesjeje sociale cilësore dhe dinjitoze për të moshuarit, si dhe rezultatet konkrete të arritura në kuadër të këtij projekti.
Ministrja e Shëndetësisë dhe Mirëqenies Sociale, Klodiana Spahiu, në fjalën e saj theksoi nevojën për të forcuar më tej shërbimet për të moshuarit dhe për t’i afruar ato sa më pranë nevojave të tyre, si dhe kërkoi më shumë përgjegjësi dhe angazhim nga strukturat që ofrojnë kujdes të drejtpërdrejtë për këtë kategori.
“Mos harroni asnjëherë që detyra juaj është ndoshta nga detyrat më të vështira që keni pasur ndonjëherë dhe kështu duhet ta konsideroni. Ju drejtoni institucione ku kategoria të cilëve ju i shërbeni është kategoria më vulnerabël, që ka më shumë nevojë jo vetëm për atë telefonatën, po ka nevojë për zërin tuaj, ka nevojë për mbështetjen tuaj, ka nevojë për afërsinë e stafit tuaj që duhet të qëndrojë pranë të moshuarve. Patjetër që ne si ministri kemi bërë projekte shumë të mira për të ofruar shërbimin në banesë për moshën e tretë, por në plane jemi mirë, në realitet duhet të përmirësojmë shërbimet në lidhje me këtë moshë. Dhe që nga ky moment ne do mundohemi të jemi më eficientë”, theksoi ministrja Spahiu.
Paralelisht, ka nisur puna për ngritjen e Shërbimit të Geriatrisë, fillimisht në QSUT dhe më pas me shtrirje graduale në spitalet rajonale, i cili synon të ofrojë kujdes të specializuar dhe të integruar për të moshuarit, duke adresuar nevojat e tyre shëndetësore në mënyrë të koordinuar dhe duke garantuar vazhdimësi të kujdesit edhe më pranë vendbanimit.
Ministria e Shëndetësisë dhe Mirëqenies Sociale po forcon shërbimet e kujdesit social për të moshuarit, duke zgjeruar mbështetjen në komunitet dhe në familje. Përmes Fondit Social, gjatë pesë viteve të fundit janë ngritur dhe funksionojnë 28 shërbime komunitare dhe të specializuara për të moshuarit, ndërsa po zgjerohet edhe asistenca shtëpiake, me synim parandalimin e institucionalizimit dhe ofrimin e kujdesit në mjedisin familjar. Në mbështetje të të moshuarve është vënë në dispozicion edhe Linja e Gjelbër 0800 4042, një kanal i drejtpërdrejtë komunikimi për këshillim, informacion dhe orientim drejt shërbimeve të nevojshme.