Kryeministri Edi Rama ka ndarë në rrjetet sociale një tjetër promovim të turizmit shqiptar, këtë herë duke sjellë në vëmendje Bujtinën SIAR në Pogradec. Përmes një postimi, Rama e përshkruan sipërmarrjen familjare si një vend ku “natyra, qetësia dhe mikpritja shqiptare bëhen bashkë”, duke vlerësuar potencialin e zonës dhe zhvillimin e turizmit rural.
Bujtina SIAR ofron nëntë kabina private prej druri, ambiente për çlodhje dhe argëtim, si edhe produkte të zonës. Sipas kryeministrit, struktura mirëpret vizitorë gjatë gjithë vitit, duke synuar të ofrojë një përvojë turistike të lidhur ngushtë me natyrën dhe traditën lokale.
”Bujtina SIAR në Pogradec, aty ku natyra, qetësia dhe mikpritja shqiptare bëhen bashkë në një përvojë të bukur turistike. Me 9 kabina private prej druri, ambiente çlodhëse e argëtuese dhe produkte të zonës, kjo sipërmarrje familjare mirëpret vizitorë në çdo stinë. E mbështetur nga AZHBR përmes Programit IPARD, Bujtina SIAR është një tjetër shembull i bukur i zhvillimit të agroturizmit dhe Shqipërisë turistike”,-shkruan Rama.
Rama ka veçuar gjithashtu mbështetjen që kjo sipërmarrje ka marrë nga AZHBR përmes Programit IPARD, duke e cilësuar Bujtinën SIAR si një shembull të zhvillimit të agroturizmit në Shqipëri. Postimi i kryeministrit vjen në kuadër të promovimit të destinacioneve dhe sipërmarrjeve turistike shqiptare, me fokus te investimet në zonat rurale dhe krijimi i modeleve të reja të turizmit jashtë destinacioneve tradicionale