Kryeministri Edi Rama ka ndarë me ndjekësit një mesazh të marrë nga juristi Amarildo Kaçaniku, i cili ky i fundit shpreh qëndrimin ndaj situatës së fundit politike dhe protestave në vend. Po ashtu Rama ka zhvilluar edhe një telefonatë video me Kaçanikun si sinjal që i riu i kërkoi që e ka marrë sms-në e tij, ku edhe thekson se nuk e ka votuar asnjëherë kryeministrin dhe se ka shumë kritika ndaj qeverisjes së tij, por njëkohësisht shpreh shqetësimin se protestat po devijojnë nga qëllimi i tyre fillestar dhe po përdoren për interesa të tjera. I riu shpreh frikën se tensionet aktuale mund të prodhojnë pasoja të padëshiruara për vendin, duke kujtuar se historia ka treguar se lëvizjet që paraqiten si shpëtim i menjëhershëm shpesh kanë sjellë probleme edhe më të mëdha.
Mesazhi i plotë
Përshëndetje, z. Rama,
Uroj që ky mesazh t’ju gjejë mirë.
Po ju shkruan një i ri i këtij vendi. Po ju prezantohem: Amarildo Kaçaniku, armiku juaj (armik politik, sigurisht).
Nuk ju kam votuar kurrë dhe kam në mendje një milion e një kritika për ju. Por kjo protestë, siç edhe ju e dini, ka marrë për kot dhe, njësoj si ju, as mua nuk po më pëlqen fare. Për një njeri që mundohet të kuptojë shkakun që sjell pasojën, duket qartë se turma po përdoret për arsye të tjera dhe jo për të mirën e Republikës sonë.
Shteti i së drejtës nuk ndërtohet brenda një dite, një muaji apo një viti, dhe këtë e di mirë, pasi nga profesioni jam jurist. Shpresoj që kjo idiotësi të ndalet pa sjellë ndonjë destabilitet, sepse e di fort mirë që historia ka treguar se ajo që shitet me zhurmë të madhe si shpëtim dhe shpresë, me shumë gjasa sjell një të keqe edhe më të madhe.
Nga ana tjetër, shpresoj dhe uroj që ju ta kaloni këtë dallgë që po ju vjen nga jashtë. Kur e gjithë kjo të përfundojë dhe këtu po ju përcjell edhe urimet e mia që kjo situatë të marrë fund sa më parë — kujtojeni këtë “armik”, të cilin mund ta bëni mik për të mirën e Shqipërisë.
Me respekt,
Amarildo Kaçaniku
P.S. Do të më bëhej qejfi nëse do të më linit një sinjal që ky mesazh është lexuar nga ju.