Krimi në Shqipëri kalon skanerin në Kongresin Amerikan, DASH vlerëson SPAK-un

Kongresisti amerikan, Joe Wilson ngriti në Kongres shqetësime për korrupsionin, krimin e organizuar dhe integritetin e zgjedhjeve në Shqipëri, duke pyetur administratën e presidentit Donald Trump se çfarë po bën për të luftuar trafikun e narkotikëve që lidhet me vendin. Pyetja iu drejtua Zëvendësndihmës Sekretarit amerikan të Shtetit, Daniel J. Lawton, gjatë dëgjesës së Nënkomitetit për Evropën të Komitetit të Punëve të Jashtme të Dhomës së Përfaqësuesve mbi politikën amerikane dhe sfidat e sigurisë në Ballkanin Perëndimor.

“Është raportuar gjithashtu se korrupsioni, krimi i organizuar dhe integriteti i zgjedhjeve në Shqipëri po ndikohen nga qeveria e Edi Ramës. Në fakt, duke nxitur krijimin e një karteli të narkotrafikut”, deklaroi Wilson. Kongresisti theksoi se Shtetet e Bashkuara kanë pasur ndër vite rezultate në bashkëpunimin me autoritetet kundër krimit të organizuar dhe trafikut të drogës.

“Çfarë po bën administrata në përgjigje të narkotrafikut shqiptar?”, pyeti Wilson. Në përgjigje, Lawton konfirmoi se Shtetet e Bashkuara vazhdojnë bashkëpunimin me qeverinë shqiptare për të luftuar organizatat kriminale transnacionale që veprojnë nga Shqipëria. “Mund t’ju siguroj se Shtetet e Bashkuara vazhdojnë të punojnë me qeverinë shqiptare për t’iu kundërvënë organizatave kriminale transnacionale që operojnë prej andej”, deklaroi Lawton.

Zyrtari i Departamentit të Shtetit theksoi se këto organizata kanë lidhje që shkojnë përtej Evropës. “Këto organizata kanë lidhje ndërkombëtare me kartelet këtu, në Hemisferën Perëndimore”, tha ai. Lawton veçoi në përgjigjen e tij edhe Strukturën e Posaçme kundër Korrupsionit dhe Krimit të Organizuar (SPAK), duke dhënë një vlerësim pozitiv për punën e saj në trajtimin e disa prej problematikave të ngritura nga Wilson.

“Në veçanti, kemi konstatuar se Struktura e Posaçme kundër Korrupsionit dhe Krimit të Organizuar ka qenë relativisht efektive në adresimin e disa prej çështjeve që ngritët”, deklaroi Lawton. Deklaratat erdhën gjatë dëgjesës në Kongres ku administrata Trump paraqiti qasjen e saj ndaj Ballkanit Perëndimor, duke e vendosur luftën kundër organizatave kriminale transnacionale mes prioriteteve të sigurisë së Shteteve të Bashkuara në rajon.