Kryebashkiaku Benet Beci: Shkodra sot flet në shumë gjuhë, por buzëqesh njësoj për të gjithë

Albert Vataj

Kryebashkiaku i qytetit të Shkodër, Benet Beci, përmes një postimi të shpërndarë në rrjetet sociale dhe një fotogalerie plot gjallëri, ka përcjellë atmosferën e vizitorëve të huaj në kryeqendrën e Veriut të Shqipërisë. Ai e ka titulluar këtë album me fjalët domethënëse: “Shkodra sot flet në shumë gjuhë, por buzëqesh njësoj për të gjithë”, një përkufizim që përmbledh më së miri frymën mikpritëse dhe energjinë kozmopolite që po merr çdo ditë e më shumë qyteti.

Kësisoj, Shkodër është shndërruar tashmë në një nga qytetet më të frekuentuara nga turistët e huaj në Shqipëri, duke hyrë natyrshëm në hartën e destinacioneve më të kërkuara të turizmit kulturor dhe historik në rajon. Ky interesim në rritje nuk është rastësi, por një dëshmi e fuqisë tërheqëse që mbart vetë qyteti, një faktor i pamohueshëm i ekzistencës dhe identitetit të tij.

Vetë Shkodra është një përvojë më vete. Arkitektura karakteristike me gjurmët e qytetërimeve të ndryshme, rrugicat me frymë mesdhetare, qendrat muzeale, trashëgimia artistike e kulturore, kalaja legjendare, liqeni dhe afërsia me Alpet, e bëjnë këtë qytet një mozaik emocionesh dhe kujtese historike. Historia e saj e jashtëzakonshme, e lidhur ngushtë me identitetin kombëtar shqiptar, me figurat e mëdha të kulturës, rezistencës dhe qytetarisë, e kthen Shkodrën në një stacion të domosdoshëm për këdo që kërkon të njohë shpirtin e Shqipërisë.

Por ajo që i jep më shumë dritë këtij qyteti është atmosfera njerëzore: mikpritja tradicionale, kultura e komunikimit, gastronomia plot shije autentike dhe ajo ndjesi lirie e harmonie që vizitori e ndjen sapo prek këtë qytet. Në Shkodër, turisti nuk është thjesht kalimtar; ai bëhet pjesë e një përjetimi që mbetet gjatë në kujtesë.

Sot, Shkodër nuk vizitohet vetëm për të parë monumente apo peizazhe, por për të ndier një qytet që vazhdon të jetojë me krenari historinë e tij, duke e hapur zemrën për botën dhe duke buzëqeshur njësoj për këdo që vjen ta zbulojë.