Ministrja Spahiu: Të lënduarit nga protesta në Tiranë jashtë rrezikut për jetën, situata po ndiqet në vijimësi

Ministrja e Shëndetësisë dhe Mirëqenies Sociale, Klodiana Spahiu, ka bërë me dije se disa persona kanë marrë trajtim mjekësor. Sipas të dhënave të raportuara nga strukturat spitalore, personat që po trajtohen aktualisht në Spitalin Universitar të Traumës janë jashtë rrezikut për jetën.

Në Spitalin Universitar të Traumës po marrin trajtim një punonjëse policie, katër protestues dhe dy kalimtarë. 6 efektivë të forcave speciale, dy përfaqësues të medias dhe katër kalimtarë janë larguar nga spitali pasi kanë marrë ndihmën e nevojshme mjekësore. Edhe në Qendrën Spitalore Universitare “Nënë Tereza” (QSUT) janë trajtuar dhe më pas janë larguar një diplomat i huaj, një përfaqësues i medias dhe gjashtë protestues.

Ministrja e Shëndetësisë thekson se ndihma mjekësore u ofrohet të gjithë personave të lënduar pa dallim, në përputhje me gjendjen klinike dhe nevojat e secilit. Spahiu ka falënderuar ekipet e urgjencës, mjekët, infermierët dhe të gjithë profesionistët shëndetësorë për angazhimin dhe kujdesin e treguar ndaj personave të lënduar.

Fjala e plotë

Ministria e Shëndetësisë dhe Mirëqenies Sociale informon mbi situatën shëndetësore të personave të lënduar gjatë protestës së zhvilluar sot në Tiranë, bazuar në informacionin e raportuar nga strukturat spitalore.

Në Spitalin Universitar të Traumës, aktualisht po trajtohen një punonjëse policie, katër protestues dhe dy kalimtarë, të gjithë jashtë rrezikut për jetën. Gjashtë efektivë të forcave speciale, dy përfaqësues të medias dhe katër kalimtarë janë larguar pasi kanë marrë ndihmën mjekësore.

Në Qendrën Spitalore Universitare “Nënë Tereza” (QSUT), kanë marrë trajtim dhe janë larguar, një diplomat i huaj, një përfaqësues i medias dhe 6 protestues.

Ministria thekson se kujdesi shëndetësor për çdo person të lënduar ofrohet pa dallim, në përputhje me gjendjen klinike dhe nevojat mjekësore të secilit.

Situata po ndiqet në vijimësi, përmes komunikimit të vazhdueshëm me institucionet shëndetësore. Informacioni mbi numrin e personave të trajtuar dhe gjendjen e tyre shëndetësore përditësohet në bazë të të dhënave të verifikuara nga strukturat përkatëse.

Ministria falënderon ekipet e urgjencës, mjekët, infermierët dhe të gjithë profesionistët shëndetësorë për angazhimin dhe kujdesin e ofruar.