Kryeministri Edi Rama dhe drejtuesja politike e PS-së për qarkun e Tiranës, Ogerta Manastirliu, kanë zhvilluar këtë të hënë takime me përfaqësues të agroturizmit në kryeqytet. Rama shpjegoi më shumë detaje nga nisma e qeverisë ”Paketa e Maleve”, e cila sipas kryeministrit nuk ka për qëllim të ndihmojë kompanitë e mëdha, apo të japë territore publike për zhvillime private. Ai tha se Paketa e Maleve ka lindur si nevojë për t’i dhënë zgjidhje një problemi që e ka origjinën te ligji 7501 dhe te konfliktet për pronat mes shumë familjeve, kryesisht në veri të vendit.
”Paketa e Maleve nuk është një paketë për kompanitë e mëdha dhe, aq më pak, një paketë për dhënien e territoreve apo trojeve publike për zhvillime private. Ky nuk është qëllimi dhe objekti i saj. Paketa e Maleve ka lindur nga nevoja për t’i dhënë drejtim një problemi shumë të madh, që e ka origjinën te ligji 7501 dhe te konflikti i shumë familjeve në zona të caktuara të vendit, kryesisht në veri dhe verilindje, të cilat nuk e kanë njohur ligjin 7501 si një instrument të vlefshëm për tokën e tyre.
Problemi i trashëguar është se këta njerëz e kanë të pamundur të kenë akses në financa dhe të ndërtojnë në mënyrë të ligjshme, sepse nuk kanë një titull pronësie. Ne bëmë një përpjekje për ta adresuar këtë problem me një ligj të ri, të quajtur 20/20. Ky ligj kërkoi shumë kohë për t’u formuluar dhe nuk dha efektin që duhej të jepte, pasi prezumon dakordësinë me shkrim të të gjithë banorëve përreth. Për këtë arsye lindi Paketa e Maleve.
Çfarë do të thotë kjo? Do të thotë se shumë shqiptarë që janë në emigracion, apo që jetojnë në qytet, kanë toka ose shtëpi të vjetra, të cilat duan t’i zhvillojnë, por nuk kanë asnjë mundësi ta bëjnë këtë, sepse, edhe nëse i kanë paratë, nuk mund të marrin leje për shkak të mungesës së titullit të pronësisë. Me Paketën e Maleve, kjo bëhet e mundur duke aplikuar drejtpërdrejt pranë bashkisë.
Bashkia e merr këtë shprehje interesi, e afishon në listë për 45 ditë dhe e bën publike, në mënyrë që kushdo që pretendon të kundërtën të ketë mundësi të reagojë. Ky ligj u shërben atyre që janë në toka të të parëve dhe që nuk kanë konflikte pronësie – dhe ka shumë raste të tilla. Brenda 45 ditëve duhet të paraqitet një kundërshti e argumentuar; nëse nuk paraqitet, lista kalon në Këshillin Bashkiak. Këshilli Bashkiak e miraton dhe personi vazhdon me aplikimin.
Ky aplikim vlen vetëm për një gjë: për të aplikuar për të marrë leje ndërtimi për një projekt. Nuk mund të marrësh tokën për ta shitur, as për ta dhënë me qira dhe as nuk fiton menjëherë titull pronësie. Pasi projekti miratohet, mund të fillojë ndërtimi. Vetëm pasi përfundon ndërtimi jo më parë – merret titulli i pronësisë. Pra, nuk mund të gëzosh një titull pronësie pa e investuar atë tokë. Nëse në një moment të mëvonshëm, shfaqet dikush që pretendon të jetë pronari dhe e fiton çështjen në gjykatë, përgjegjësinë nuk e mban investitori, por shteti. Kjo është trajektorja që ndjek kjo paketë. Në thelb, ajo është një paketë shumë pro biznesit”,-tha Rama.
