Policia e Shtetit paralajmëron qytetarët për skemat piramidale online: Mos besoni në investime që premtojnë fitim të menjëhershëm

Policia e Shtetit, gjatë konferencës ku njoftoi finalizimin e operacionit “Xuex”, paralajmëroi qytetarët për skemat piramidale online.

Përdorimi i kriptomonedhave në këtë skemë nuk ishte rastësor, njofton Policia, ato u zgjodhën pikërisht për vështirësinë që ofrojnë në gjurmim dhe për perceptimin e gabuar që kanë tek shumë qytetarë si mjete “moderne” dhe të sigurta për investim.

“Ky rast duhet të shërbejë si një thirrje e fortë për ndërgjegjësimin e qytetarëve: mos besoni në “investime të sigurta” që premtojnë fitim të menjëhershëm. Mos lejoni që emocionet, dëshira për përfitim të shpejtë apo presioni nga persona të njohur t’ju shtyjë të bëheni pjesë e strukturave të tilla. Ato nuk janë mundësi investimi – janë mashtrime të strukturuara, të sofistikuara dhe të rrezikshme, ku në fund gjithmonë humbin më të pambrojturit”.