Prefekti i qarkut Tiranë, Shkëlqim Hajdari, u ka bërë thirrje qytetarëve dhe institucioneve të rrisin vigjilencën për parandalimin e zjarreve, për shkak të temperaturave ekstreme dhe rrezikut të lartë që ato paraqesin. Ai falënderoi strukturat e Mbrojtjes nga Zjarri dhe Shpëtimit, Forcat e Armatosura, Policinë e Shtetit, aviacionin, Administratën e Zonave të Mbrojtura, shërbimet pyjore, emergjencat civile të bashkive dhe vullnetarët për angazhimin në përballimin e vatrave të zjarrit, përfshirë edhe atë në malin e Dajtit.
Postimi i plotë
Të nderuar qytetarë të Qarkut Tiranë, në këto ditë me temperatura ekstreme, rreziku nga zjarret është shumë i lartë. Çdo pakujdesi mund të kthehet në një tragjedi për jetën e njerëzve, për pyjet, kullotat, pronën dhe mjedisin tonë.
Së pari, dua të shpreh mirënjohjen dhe falënderimin tim për të gjitha strukturat që janë në krye të detyrës: shërbimet e Mbrojtjes nga Zjarri dhe Shpëtimit, Forcat e Armatosura, Policinë e Shtetit, aviacionin, Administratën e Zonave të Mbrojtura, strukturat e emergjencave civile të bashkive, drejtoritë e shërbimit pyjor, si edhe vullnetarët pranë njësive administrative. Falë profesionalizmit, gatishmërisë dhe sakrificës së tyre janë parandaluar dhe përballuar me sukses shumë vatra zjarri, (perfshire dhe zjarrin e rënë pas faqes së malit të Dajtit).
Por beteja nuk ka mbaruar. Përkundrazi, ditët që kemi përpara kërkojnë angazhim edhe më të madh. Prandaj u bëj thirrje të gjitha institucioneve të vijojnë punën me të njëjtën disiplinë, koordinim dhe përkushtim, me synimin që çdo vatër zjarri të parandalohet ose të neutralizohet që në momentet e para.
Një apel të veçantë kam për çdo qytetar: Mos digjni barin e thatë, mbeturinat apo mbetjet bujqësore. Tregoni kujdes maksimal me bombolat e gazit, me zjarret në ambiente të hapura dhe mos hidhni bishta cigaresh në natyrë apo përgjatë rrugëve. Mjafton një çast pakujdesie për të shkaktuar pasoja të rënda.
Njëkohësisht, kërkoj nga Policia e Shtetit të intensifikojë kontrollet për identifikimin dhe arrestimin e çdo personi që, me dashje ose nga pakujdesia, bëhet shkaktar i zjarreve. Ligji do të veprojë me gjithë forcën ndaj kujtdo që rrezikon jetën e qytetarëve dhe pasuritë publike e private. Mbrojtja e natyrës është mbrojtje e jetës. Mbrojtja e pyjeve është mbrojtje e së ardhmes së fëmijëve tanë. Le të tregojmë përgjegjësi qytetare. Le të jemi të bashkuar dhe vigjilentë. Së bashku do ta mbrojmë Qarkun e Tiranës nga zjarret.